د ولسي جرګې یو شمېر غړو په هېواد کې د طالبانو له لوري د ګڼو ولسوالیو نیول د جدي اندېښنې وړ مسله ده او امنیتي ادارې یې پر بې کفایتۍ تورنې کړې.
د یادې جرګې ګڼو غړو د نننۍ غونډې په امتیازي ساعت کې د خبرو په مهال د جګړو او نا امنیو په تړاو د حکومت چوپتیا هم د جدي اندېښنې وړ بللې ده او وایي، ولس د ځواب په تمه دی.
وکیلان وايي، داسې ښکاري، چې د ولسوالیو سقوط یوه معامله ده، نو له همدې امله حکومت هم چوپتیا غوره کړې.
د ولسي جرګې غړي وایي، د حکومت مسوولیت دی،چې ژر تر ژره خلکو ته د روان حالت په اړه سپیناوی ورکړي.
د ولسي جرګې غړو دغه راز په امنیتي ادارو کې وروستۍ ګومارنې او ادلون بدلون هم د خندا وړ بللی دی او په خبره یې حکومت یوازې ثابتې شوې او تکراري څېرې چې پخوا یې هم لاس ته راوړنې نه دي لرلې له یوه ځایه بل ځای ته تبدیلوي.
دوی همدا راز له ولسمشر وغوښتل،چې ژر تر ژره د سرپرستۍ دود ختم او د امنیتي ادارو لپاره په دې حساسو شرایطو کې وړ او په کار پوه کسان وګوماري.