د امريکا د ملي امنيت سلا کار جک سليوان وايي، لاهم د ۲۰۱۵ کال اټومي تړون اړوند خبرو کې د ايران او نړۍ ځواکمنو هېوادونو ترمنځ په ځينو مواردو کې هوکړې ته د رسېدو پر سر مخالفتونه شته.
سليوان له اې بي سي نيوز سره په يوه ځانګړې مرکه کې ويلي، چې دې برخه کې لاهم زيات کار ته اړتيا شته او بايد هڅې ورته وشي.
سليوان پر ايران د مشخصو بنديزونو لرې کولو په اړه څه ونه ويل، چې له ډلې يې پر نوي ټاکل شوي ولسمشر ابراهيم رئيسي لګېدلي دي.
سليوان ويلي، هغه بنديزونه چې لرې به شي اوس مهال ويانا کې تر بحث لاندې دي.
د ايران، چين، روسيې او اروپايي هېوادونو ترمنځ تر دې مهاله د اتريش په پلازمېنه ويانا کې شپږ پړاوه خبرې ترسره شوي، چې امريکا د ۲۰۱۵ کال هغه اټومي تړون ته ور وګرځوي، چې په ۲۰۱۸ کال کې ترې بهر شوې وه.