له تېرو درېیو کلونو راهیسې د امریکا پوځي او سیاسي چارواکي وخت ناوخته په خپلو څرګندونو کې ویلي، په افغانستان کې د امریکایي وګړي نیول د واشنګټن او کابل ترمنځ د مثبت تعامل پر وړاندې خنډ دي او له سرپرست حکومت یې تل غوښتي، چې یاد امریکایي وګړي ژر تر ژره خوشې کړي.
تازه د امریکا بهرنیو چارو وزارت ویاند وېډانټ پټېل ویلي، د افغانستان لپاره د امریکا ځانګړو استازو د دوحې په ناسته کې یو ځل بیا د امریکایي وګړو پر خوشې کولو ټینګار کړی او دغه راز یې د سرپرست حکومت پر پلاوي فشار راوړی، څو امریکایي وګړي پرته له کوم قید او شرط خوشې کړي.
پټېل زیاته کړې:« د افغانستان لپاره د امریکا ځانګړي استازي توماس وېسټ د دوحې د تېرې ناستې په لړ کې د امريکايي وګړو خوشې کېدو له امله د افغانستان پر پلاوی فشار راوړی، څو امریکایي بندیان را خوشي شي. هو! دا ویلی شم، چې د واشنګټن دا غوښتنه همېشنۍ ده او په هر فرصت کې به يې له کوم قيد او شرط د امريکايي وګړو د خوشې کېدو يادونه کوي. توماس وېسټ او رینا امیري په دوحې ناسته کې د نورو موضوعاتو ترڅنګ په دې اړه له طالبانو سره مخامخ خبرې کړې دي.»
د سرپرست حکومت چارواکي هم تائیدوي، د دوو امریکایي وګړو په ګډون څو تنه بهرني وګړي له سرپرست حکومت سره بندیان دي.
د دوی په خبره، دوحې کې له امریکايي پلاوي سره د دوو امریکايي بندیانو په خوشې کېدو خبرې شوې.
که څه هم چارواکي د بنديانو د تبادلې په تړاو واضيح څه نه وايي، خو زیاتوي د ګوانتانامو په زندان کې د دوو بندي افغانانو خلاصون سرپرست حکومت ته ډېر مهم دی.
د اسلامي امارت ویاند ذبیح الله مجاهد وايي:« د امریکايي استازو سره د خبرو پر مهال ځېنې موضوعات چې لا باقي پاتې، موږ تر بحث لاندې ونیول. دوه امریکايي اتباع په افغانستان کې بندیان دي، د هغوی خلاصون په اړه موږ له دوی سره مخکې هم بحثونه کړي ول، د افغانستان شرایط باید ومنل شي، په هغه شرط باندې موږ هم اتباع لرو، چې په امریکا کې بندیان دي، په ګوانتانامو کې بندیان دي، د هغوی پر وړاندې باید موږ خپل اتباع راخلاص کړی شو، که نه څرنګه چې امریکايي اتباع هغوی ته مهم دي، موږ ته افغانان مهم دي. موږ په دې اړه له هغوی سره بحثونه کړي، خو دلته هم لنډه اشاره وشوه، هلته وخت کم وه، نور موضوعات ډېر ول، د هغوی پخواني چینلونو له لارې به دې موضوع ته د حل لاره پیدا شي.»
په دې وروستیو کې د امریکا ملي امنیت دوو چارواکو (اېن.بي.سي) نیوز ته ویلي وو، چې د دغه هېواد دوه وګړي د سرپرست حکومت په بند کې دي.
یادو چارواکو زیاته کړې وه، چې ریان کوربېټ او یو تن چې تر اوسه یې بشپړ هويت نه دی څرګند شوی، افغانستان کې د امنیتي ځواکونو له لورې نیول شوي او بندیان دي.
د سیاسي او پوځي چارو کارپوهان وایي، د کابل او واشنګټن د اړیکو پراختیا لپاره پکار ده چې دواړه هېوادونه د یو بل غوښتنې ومني، څو رسمي اړیکې پیل او دغه راز تعامل ته زمینه برابره شي.
د پوځي چارو کارپوه توریالی ځاځی وايي:« دوی باید په خپلو منځو کې خپلې ستونزې حل کړي او افغانستان باید د دوی د سیاسي اهدافو قرباني نه شي. په دې ځېنو مسایلو کې سړی باید واقعیت ووایي، چې هم دا غربي نړیوال هېوادونه ، د ګاونډیو په ګډون او هم دا څه نظامونه چې په افغانستان کې واک ته رسېدلي، تېروتنې یې ترسره کړي، اوس نو هغه وخت رسېدلی، وروسته له نیمې پېړۍ دوی په ښو او بدو باندې باید پوه شي، چې ښه څه دي او بد څه دي.»
دا په داسې حال کې ده، چې له دې وړاندې، د امريکا کانګرس بهرنیو اړیکو کمېټې مشر مایکل مککال ویلي و، د هغو امریکایي وګړو د خوشې کولو هڅې دوام لري، چې د اسلامي امارت په بند کې دي او ټینګار یې کړی و، چې ډيموکراټان او جمهوري غوښتونکي په یوه خوله د سرپرست حکومت له لوري د امریکایي وګړو نیول او بندي کول د زغم وړ نه بولي.
