د حج، ارشاد او اوقافو وزیر محمد قاسم حلیمي وايي، جګړه کې ښکیل اړخونه باید د اسلامي نړۍ علماوو پرېکړې ته درناوی وکړي،چې په افغانستان کې یې روانه جګړه ناروا بللې.
حلیمي وايي، افغانستان کې روانه جګړه د قراني او نبوي نصوصو خلاف روانه ده او باید ختمه شي.
د حلیمي په خبره،هغو پاکستاني علماوو چې تر پرون یې د طالبانو جګړه رواه بلله، نن هغوی هم یاده جګړه ناروا ګڼي.
حلیمي زیاته کړه:« بدبختانه او خوشبخاته باید دواړه ووایم. بدبختانه ځکه چې پاکستاني علماوو څو ورځ وړاندې پورې هم د افغانستان دولت پر وړاندې د جګړې فتوا ورکوله. خو د مکې مکرمې په ناسته کې یې په صراحت سره وویل، افغانستان کې روانه جګړه ناروا ده. »
هغه وايي، د پاکستان له علماوو سربېره د فقې اسلامي ټولنې علماوو، د عالم اسلامي رابطې ټولنې، د مکې مکرمې امام او نورو ټولو اړوندو هېوادونو په یوه غږ یاده جګړه حرامه بللې او د حل لپاره یې بین الافغاني خبرې اترې وړاندیز کړي دي.
حلیمي وايي: « هماغه وه، چې د ۲۰۱۸ زېږدیز کال د جون میاشت ۱۰ او ۱۱ نټیو د مکې معظمې ښار کې مو کنفرانس درلود. کنفرانس کې د اسلامي نړۍ علماء راټول شوي ول او په ښکاره یې وویل، دا یوه ناروا جګړه ده. »
دغه وزارت وایي، له تېرو دوه کلونو راهیسې په افغانستان او له افغانستانه بهر د نړۍ علماوو په ځلونو فتوا ورکړې،چې افغانستان کې روانه جګړه نارواه ده او باید ودرول شي.
طالبانو بیا تر اوسه پورې د حکومت دغې تازه غوښتنې په اړه څه نه دي ویلي.
