په پلازمېنه کابل ښار کې د امنیتي ستونزو ډېرېدو له امله خلکو عمومي سړکونو ته دروازې اېښي او قلفونه یې ورته اچولي دي.
خلک وايي، نازک امنیتي حالت، دهدفي وژنو وروستیو پېښو او د وسله والو غلاوو وېرولي او په وینا یې، غله او ترور کوونکي له لويو سرکونو په ګټنې اسانۍ سره تېښته کوي.
د اتمې حوزې یو تن اوسېدونکی وایي: « دلته دولتي لوړپوړي چارواکي اوسېږي او دا کوڅې تر امنیتي ګواښ لاندې وې. له همدې امله خلکو پرېکړه وکړه او کوڅې یې بندې کړې. »
خو د سړکونو بندول او د ورته دروازو لګولو سره ګڼو خلکو ته ستونزې پيدا شوي دي.
ښاريان وايي، د دولت له خوا پاخه سړکونه په شخصي ملکيتونو ګرځېدلي او يوازې د اړونده کوڅو خلکو ته پرې د تګ راتګ اجازه ورکول کېږي.
د کابل ښار اوسېدونکی وايي: « شااوخوا یو کال کېږي، چې دا کوڅې د دولت له لوري پخې شوې. دا عامه کوڅې دي. د دې خلکو له امله دا کوڅې زموږ پرمخ تړل شوي. دې چارې ډېری کسان له ستونزو سره مخ کړي دي. »
په شپږ نيمو بجو ناسته کې هم د بندو سړکونو د پرانېستلو لارښونه شوې وه، خو په يو شمېر ښاري سېمو کې دا پرېکړه نه ده پلې شوې.
اړونده حوزې د سړکونو د پرانېستنې ژمنه کوي.
د اتمې حوزې مشر ګل رحمن احمدزی وايي: « موږ به دا ستونزه د کورنیو چارو وزات او امینه قوماندانۍ سره حل کړو. که چېرې دلته کوم امنیتي ملاحاظات یا امنیتي ستونزې وي. اتمه حوزه به خپله ستونزه حل کوي او بګرامیو ولسوالۍ به خپله ستونزه حل کوي. »
دا یوازې هغه لویې کوڅې او سړکونه دي،چې د سیمې خلکو له خوا ورته دروازې لګول شوي او بندې دي، د ښار ډېری برخو کې یو شمېر لوی سړکونه او عمومي لارې بیا د ملي شورا غړو، چارواکو او زورواکانو له خوا بیا پر سمنټي موانعو بندې شوي دي.