سیمه ییزې امنیتي سرچینې وایي، تېره شپه د خواجه سبزپوش ولسوالۍ امنیه قومندان له ۱۲ تنو پولیسو سره یو ځای طالبانو ته تسلیم شوي دي.
د سرچینې په وینا، د قومندان له تسلیمېدو وروسته طالبانو د دغې ولسوالۍ پر امنیتي پوستو بریدونه پیل کړل.
سرچینه زیاتوي، چې له سختې جګړې وروسته نن سهار یاده ولسوالۍ په بشپړ ډول طالبانو ونیوله.
امنیتي منابع وایي چې د خواجه سبزپوش ولسوالۍ د سقوط پر مهال ځیني سرتېري وژل شوي او ټپیان دي او یو شمېر نور ژوندي نیول شوي دي.
طالبانو هم ویلي چې د فاریاب جمعه بازار یا خواجه سبزپوش ولسوالۍ یې سقوط کړې ده.
دولتي چارواکو تر اوسه په رسمي ډول په دې اړه څه نه دي ویلي.