د هېواد د پر کچه له بادغیس وروسته د سمنګان اړوند د پستو دويم لوی ځنګل دی، چې شاوخوا ۶۰ زره جرېبه ځمکه يې نيولې.
د سمنګان کرنې رياست د مالدارۍ چارو امر نیاز محمد عابد وایي، د پستو ځنګلونو ساتنه په سمه توګه کېږي او د لاخونديتوب په موخه به يې نږدې راتلونکي کې د شنې قطعې يوه قطعه هم دغه ولایت ته راشي او د ځنګلونو د ساتنې مسووليت به ورکړل شي.
عابد زیاتوي:« دا له پخوا راهسې خپل ساتونکي لري، د اوس لپاره موږ ته د وزارت له لوري تر ۵۰ اضافه کسان منظور شوي دي، خو لا یې فعالیت نه دی پیل کړی، هغوی به هم ان شاءالله خپل فعالیت پیل کړي او موږ هم د دې ځنګله ساتنې ته متوجې یو او سږکال یې د نورو کلونو په پرتله ښه پسته نیولې. په ټول سمنګان کې تر ۶۰ زره جریبه ځمکې پورې دا ځنګل رسېږي.»
که څه هم ځنګلونه څه نا څه طبیعي افتونو ځپلي، خو د سیمې اوسېدونکي وایي، د سرپرست حکومت له واک ته رسېدو راهيسې په بشپړ ډول د ځنګلونو ساتنې راهيسې د خپلسري حاصلاتو ټولولو مخه نېول شوې ده.
د سمنګان یو تن اوسېدونکی وايي: « له مسوولینو غواړو چې دا ونې یوه طبیعي افت نیولي او هغه ونې چې عمر یې زیات وي نو حتمي یې نیسي، مسوولین دې د دې لپاره موږ ته درمل راکړي چې دا پاکې او وساتل شي.»
د سمنګان یو بل اوسېدونکی بیا وايي: « اسلامي امارت د پستې ځنګل ته ډېره پاملرنه کړې او شنه قطعه یې ورته راستولې ده چې ان شاءالله دوی به ډېره ښه توجو ورته وکړي.»
ځایي مسوولین ډاډ ورکوي وایي، تر ډېره بریده یې د طبیعي افتونو مخنیوي لپاره د درملو ورکړي او لاهم هڅه کې دي څو یې ښه پالنه وکړي.
د سمنګان کرنې رياست د طبیعي سرچینو امر محمود صدیقي وايي: « الحمدالله سږکال تر تېر کال حاصلات زیات دي، زموږ پسته ۴۰ سلنه زیاته شوې او دا ډېره ښه ده. په سمنګان له ۵۰ تر ۶۰ زره جریبه ځمکه کې د پستې ونې لرو. سږکال چې ونې یو څه طبیعي افت نیولې علت یې دا دی چې ورښتونه زیات و او د دې لپاره درمل شته، چې د ځنګه ساتونکو او ځنګلونو د ټولنې مشرانو ته چې موږ یې په هره سیمه کې لرو، درمل سپارو او ان شاءالله دا ستونزه به هم هواره شي.»
د مالوماتو له مخې، سمنګان کې د پستې له دې ځنګله تېر کال ۱۲۰ ټنه پسته یوازې بهرنیو هېوادونو ته صادر شوې، چې سږني حاصلاتو ته په کتو به روان کال دغه صادرات دوه برابره لوړ شي.
