د امريکا ولسمشر جوبايډن د ناټو په سر مشريزه کې ويلي چې ځواکونه يې له افغانستان د وتلو په حال کې دي او دوی به دغه هېواد سره خپلو مرستو او اړیکو ته دوام ورکړي.
جوبایډن وايي: « زموږ ځواکونه هېواد ته را ستنېږي، خو موږ هوکړه وکړه، چې زموږ ډيپلوماټيک، اقتصادي او بشري مرستې به افغانانو سره دوام وکړي او افغان ملي دفاعي او امنيتي ځواکونو سره به زموږ ملاتړ دوامدار وي.»
د ناټو له سر مشريزې وروسته د ياد سازمان مشر خبريالانو سره په خبرو کې ويلي، چې د ياد سازمان غړو هېوادونو افغانستان سره د مرستو ژمنې بيا تازه کړي.
د ناټو عمومي منشي ين سټولټنبرګ وویل: « د ناټو غړو هېوادونو افغانستان سره د افغان ځواکونو روزنې، مالي فنډ، حامد کرزي نړيوال هوايي ډګر د چارو تنظيم په برخو کې خپلې ژمنې بيا تازه کړې.»
بايډن ويلي، د ناټو د غړو هېوادونو د هغې پرېکړې هرکلی کوي، چې افغانستان کې د ترهګرۍ پر وړاندې د مبارزې هڅې بايد جاري وساتل شي، ترڅو یو ځل بيا د ترهګرو په خوندي ځای بدل نه شي.
جو بایډن وایي: « زه د متحدينو د پرېکړې هرکلی کوم چې افغانستان کې د ترهګرۍ سره مبارزې هڅې بايد دوام وکړي، ترڅو دغه هېواد بيا ترهګرو لپاره په خوندي ځای بدل نه شي او زموږ په هېوادونو بيا بريد ونکړي.»
د ناټو په دې سر مشريزه کې افغانسان سره د مرستو د دوام دا ژمنه داسې مهال کېږي، چې د روان کال سپټمبر مياشت پورې ټول امريکايي او ناټو ځواکونه له هېواد څخه بهر کېږي.
