د پاکستان بهرنیو چارو وزیر شاه محمود قریشي اسلام اباد کې د پاک – افغان ډیالوک کې د وینا پر مهال وویل،هېواد یې په افغانستان کې له سولې سره رېښتونی او بې ریا دی.
قریشي وايي، پاکستان غواړي، له افغانستان، سیمې او د امریکا له متحده ایالاتو سره ملګری شي او په خبره یې پاکستان هم په سیمه کې د جګړو لویه بیه پرې کړې ده.
هغه وايي، پاکستان په افغانستان کې د نه لاسوهنې ډېره ښکاره پالېسي لري.
په ورته وخت کې هغه وايي،که چېرې افغان چارواکي پاکستان د سولې په پروسه کې په ګډوډۍ تورن کړي، پاکستان به یې مسوولیت ونه مني.
قریشي زیاته کړه: « زه دوی ته د ښه بخت هېله لرم او هیله لرم،چې ښه سفر ولري؛ خو باید له وړاندې یو څه ښکاره ووایم. که چېرته واشنګټن ته د افغان ولسمشر او یو شمېر نورو لوړپوړو چارواکو د سفر موخه د پاکستاتن پړه ګڼلو وي او پاکستان په افغانستان کې د ټولو ورانیو او د سولې پروسې کې د کم پرمختګ مسوول ګڼل وي، نو ښکاره ده،چې دا خبرې به ګټه ونه لري.»
د پاک- افغان دوه اړخیزه ډیالوګ نن پلازمېنې اسلام اباد کې پيل شوی، چې له دواړو لورو یو شمېر پخوانیو او اوسنیو چارواکو، ډېپلوماټانو، سیاسي مشرانو او فعالانو په کې ګډون کړی.
