د ولسمشر محمد اشرف غني د رسنیو سلاکار او نوموتی خبریال نبي مصداق چې له تېرو څو ورځو راهېسې پر کورونا وبا اخته و، پرون شپه مړ شو.
د اطلاعاتو او فرهنګ وزارت د کورونا وبا له امله د مصداق مړینه تائیدوي او لویه ضایعه یې وبلله.
بل پلو ولسمشر غني د مصداق پر مړینه خواشینې ښوولې ده.
د ولسمشرۍ ماڼۍ له لوري په خپره شوې خبرپاڼه کې د غني له قوله لیکل شوي:«مرحوم مصداق کلونه د ژورنالېزم له لارې د مظلومو افغانانو غږ پورته کړ او د یوه لیکوال په توګه یې د اوسنۍ غمیزې د حقیقتونو په بیانولو سره ځوان نسل د یو روښانه تاریخي مسیر پر لور رهنمایي کړ. »
تر مصداق څو ورځې وړاندې نوموتی لرغونپوه، د اطلاعاتو او کلتور وزارت پخوانی مرستیال پوهاند محمد رسول باوري او د کانکور ازموینو ته د چمتوالي استاد نظر زلمي هم د کورونا وبا له امله ژوند له لاسه ورکړ.
