د ننګرهار ولایت په مرکز جلال اباد کې د سولې او اوربند پر ملاتړ د پیاوړو مېرمنو شبکې لسګونه غړو لاریون کړی او غوښتنه یې دا وه،چې هر څه ژر دې جګړه پای ته ورسېږي او د سولې خبرې دې ګړندۍ شي.
لاریونوالې وايي، له جګړې پردي ګټه پورته کوي او له نړیوالې ټولنې یې وغوښتل،چې د سولې برخه کې د رېښتنی اقدام وکړي.
لاریونواله حسینه نوري وايي:« جګړه کې دواړه لوري افغانان وژل کېږي، که پولیس او که طالب. زموږ غوښتنه دا ده،چې دواړه لوري جګړې ته د خبرو له لارې د پای ټکی کېږي. »
لاریون کوونکو د شته نظام او افغان ځواکونو ننګه هم وکړه او ویې ویل، ټولې خواوې باید پر ګډه د هېواد د پرمختګ او شته خنډونو د له منځه وړلو لپاره کار وکړي.
لاریونواله مقدسه سالارزۍ وايي:« افغانان مسلمانان دي، کافران خو نه دي،چې پر وړاندې یې جهاد کوئ. طالبانو وروڼو! راځئ، چې سره کینو، یو لاس شو او خپل دښمن وپېژنو. »
تر هغې وروسته چې هېواد کې جګړو زور اخیستې، د ښکېلو اړخونو سره سره ولس هم خوندي نه دی. د مرګ ژوبلې ترڅنګ، زرګونه کورنۍ له خپلو سیمو ګډه شوي او ګڼ مالي زیانونه هم وراوښتي.
