امریکا بهرنیو چارو وزارت ویلي،د افغانستان له ګاونډیو هېوادونو سره یې خبرې کړي،چې افغانستان کې د حالت له ترینګلتیا سره سم، د افغان کډوالو پر مخ خپلې پولې پرانیزي.
یاد وزارت ویلي، که څه هم ټاکل شوې وه،چې له افغانستانه به د دوی د ځواکونو د اېستلو لړۍ د روان کال د سپټمبر تر ۱۱مې بشپړه شي، خو په خبره یې تر دې دمه یې له ۵۰ سلنې ډېر پوځیان او تجهیزات اېستلي دي.
د سرچینې په خبره، دوی له افغانستانه د خپلو پوځیانو د اېستلو لړۍ په دې وروستیو کې چټکه کړې،چې ښايي تر ټاکلې نېټې مخکې پای ته ورسېږي.
د امریکا د بهرنیو چارو وزارت داسې مهال د افغانستان له ګاونډیو هېوادونو سره د افغان کډوالو پر مخ د پولو د پرانېستل کېدو خبره کوي، چې په دې وروستیو کې حالت ورځ تر بلې د ترینګلتیا پر لور روان دي او هره ورځ پراخې سیمې د طالبانو لاس ته لوېږي.
