د فاریاب ولایت په دولت اباد ولسوالۍ کې د هوایي برید پر مهال د یوه ښوونځي ودانۍ ویجاړه شوې او ۶ ملکیان هم ټپیان شوي دي.
د فاریاب د ولایتي شورا غړی عبدالاحد ایلبیک وایي، تېره ورځ افغان هوایي ځواکونو د دولت اباد ولسوالۍ مرکز کې یو شمېر سیمې بمبارد کړي دي.
دولت اباد ولسوالۍ تېره اونۍ له سختو جګړو وروسته طالبانو سقوط کړه.
د ولایتي شورا دغه غړی وایي، چې د تېرې ورځې هوايي بریدونو کې د دولت اباد مرکز اړوند شهید عبدالرحمن لیسې دوه ودانۍ چې تازه جوړې شوې وې، تخریب شوي دي.
هغه وایي، په دغه پېښه کې ۶ تنه ملکیان هم ټپیان شوي دي.
له بل لوري بیا شمال زون کې ۲۰۹ شاهین قول اردو وایي، چې تېره ورځ یې د فاریاب په دولت اباد او شیرین تګاب ولسوالیو کې د هوایي برید پر مهال ۷ وسله وال طالبان وژلي او یو شمېر نور یې ټپیان کړي دي.
د شاهین قول اردو ویاند حنیف رضایي په یاده پېښه کې د یوه ښوونځي تخریب او دغه راز د ملکیانو د ټپي کېدو خبر ردوي.
طالبانو تر اوسه په دې تړاو څه نه دي ویلي.