د اسلامي امارت مشرتابه شیخ هبةالله اخندزاده د لوی اختر په رارسېدو ملت ته په خپل اختریز پیغام کې ګڼو برخو ته اشاره کړې.
پیغام کې راغلي، اسلامي امارت د شریعت په چوکاټ کې له نړۍ او په تېره بیا اسلامي هېوادونو سره رغنده سیاسي او اقتصادي اړیکې غواړي او په وینا یې په دې برخه کې یې خپل ټول ورګرځېدلي مکلفیتونه ادا کړي دي.
د اختریز پیغام یوه برخه: « اسلامي امارت له ټولې نړۍ او په ځانګړې توګه له اسلامي هېوادونو سره د شریعت په چوکاټ کې سياسي او اقتصادي اړیکې غواړي او په دې برخه کې يې خپل مکلفیت ادا کړی دی.»
په پیغام کې راغلي چې له اوسنۍ واکمنۍ سره د کانونو، ځنګلونو او دولتي ځمکو په ګډوڼ ټولې ملي شتمنۍ تر بل هر وخت خوندي، د هر راز ظلم مخه نیول شوې او د شرعي محاکمو فعالیت سره په ټول هېواد کې شریعي اصول پلي شوي.
د اسلامي امارت زعیم وايي، سرپرست حکومت د امنیت په ګډوڼ هېواد کې د ټولو اتباعو د حقونو ورکړې ته ژمن دی او په خبره یې دغه حقونه تر بل هر وخته خوندي دي.
د اختریز پیغام یوه برخه: « د اسلامي امارت په حاکمیت سره د ټولو اتباعو شرعي حقوق خوندي او محفوظ دي، هېڅوک پر چا ظلم او تېری نه شي کولی، د ظلم مخه نیول کېږي او د مظلوم د حق پوښتنه کیږي.»
پیغام کې د بیارغونې، کرنې، اوبو لګونې، سړک جوړونې او د کانونو د استخراج په برخه کې د اړینو
ګامونو د پورته کېدا او په یادو برخو کې د چارو د دوام خبر ورکړل شوی او د اقتصادي لاپرمختګ او په دې برخه کې د شته ستونزو د حل په موخه په هېواد کې د پانګوونې پر اړتیا او مسوولیت ټینګار شوی دی.
د اسلامي امارت مشرتابه په دې پیغام کې دغه راز پر ټولو حکومتي چارواکو غږ کړی چې د خلکو هوساینې او خوندیتوب ته پوره پام او په دې برخو کې خپل مسوولیتونه په سم ډول ادا کړي.
د دې ترڅنګ له دوی غوښتل شوي چې داسې کړنې او چلن ترسره نه کړي چې د ملت او حکومت ترمنځ د واټن د رامنځته کېدا لامل شي.
داختریز پیغام یوه برخه: «د اسلامي امارت مسوولینو ته مې توصیه دا ده چې د خپل مسوولیت په ټولو برخو کې د خلکو د خدمت، امنیت او هوساینې لپاره خپل مکلفیتونه په جدیت سره سرته ورسوي. خپلې دروازې د ولس پر مخ خلاصې کړي ، کارونه یې په احسنه او عاجله طریقه اجراء کړي، له خلکو سره هېڅکله داسې چلن ونه وکړي چې ځانونه له تاسو پردي وبولي.»
په دې پیغام کې که څه هم د دیني شعائرو د لوړتیا او د دیني مراکزو د پراختیا، پرمختګ او ودې په برخه کې د مهمو اقداماتو د پورته کېدا خبره شوې؛ خو د نجونو د زدکړو او د دوی پر مخ د ښوونځیو او پوهنتونونو د بېرته پرانېستلو په تړاو څه نه دي ویل شوي. هغه څه چې ملت او په تېره بیا له زدکړو بې برخې افغانې نجونو یې له تېرو زرو ورځو راهیسې په تمه دي.
