د ملګرو ملتونو عمومي منشي ځانګړي استازي ژان ارنو د بهرنیو چارو له وزیر حنیف اتمر سره کتلي او پر بېلابېلو مسایلو یې خبرې کړې دي.
نوموړي ویلي،ملګري ملتونه او ټول هغه اړخونه،چې د افغانستان د سولې ملاتړ کوي، د اوسني تاوتریخوالي او روان وضعیت مخالف دي او د دې غوښتونکي دي،چې ژر تر ژره جګړې کمه او یو دایمي اوربند رامنځ ته شي.
هغه زیاته کړې،چې ملګري ملتونه په افغانستان کې د اوربند د تامین لپاره خپلو هر اړخیزو هڅو ته ادامه ورکوي او تمه لري،چې روانې جګړې ژر تر ژره ختمې شي.
حنیف اتمر هم د سولې په راتګ کې د نړیوالې ټولنې او ملګرو ملتونو مرسته او همکاري اړینه بللې او ټینګار یې کړی،چې د سولې د راوستو لپاره دې خپل فشارونه ډېر کړي.