په بلخ کې ځايي سرچينې تائيدوي، چې نن سهار د زارع ولسوالۍ او امنيه قوماندانۍ ودانۍ د طالبانو لاس ته لوېدلي دي.
د سرچينو په حواله، پرون شپه پر دغې ولسوالۍ طالبانو ډله ييز بريدونه هم کړي وو.
په ورته مهال طالبانو رسنيو ته د يوې خبرپاڼې په استولو سره ويلي، د ولسوالۍ، امنيه قوماندانۍ او امنيت رياست ودانۍ د دوی لاس ته لوېدلي دي او له افغان ځواکونو يې ګڼ شمېر تجهيزات هم تر لاسه کړي دي.
شمال زون کې د ۲۰۹ شاهين قول اردو مطبوعاتي دفتر هم تائيدوي، چې افغان ځواکونو په زارع ولسوالۍ کې یواځې خپل موقعيت ته تغیر ورکړی دی.
د شاهين قول اردو له خوا په خپره شوې خبرپاڼه کې ويل شوي، چې د زارع ولسوالۍ پخوانی موقعيت کلابند وو او امکانات رسول ورته ستونزمن وو.
په خبرپاڼه کې ويل شوي، چې له همدې امله نن سهار ۸ بجې افغان ځواکونه د ولسوالۍ له پخوانۍ ودانۍ وتلي او د يادې ولسوالۍ په يوه بله سيمه کې ځای پر ځای شوي دي.