کابل او یو شمېر نورو ولایتونو کې د جګړې له شدت سره هم مهاله د جنايي جرمونه، هدفي وژنو او غلاوو ګراف لوړ شوی دی.
هغه کسان چې په کابل ښار کې کاروبار لري وايي، د اندېښنو له امله ډېری خلک له رواني ستونزو سره مخ شوي.
د کابل ښار اوسېدونکی وايي:« کابل کې روان حالت ډېر خرابه دی. هره ورځ خلک ترور کېږي. غلاوې زیاتې شوي. له همدې امله یو شمېر کسان پر رواني ناروغۍ اخته شوي. »
د جمعې په شپه د کابل ښار په اتمه حوزه کې یوه وسله وال کس ۵ کسان په ډزو ویشتلي، چې ۲ تنه وژل شوي او ۳ نور ټپيان دي.
د کورنیو چارو وزارت ویاند مرستیال احمد ضیاء ضیاء وايي:« په خواشینۍ سره چې پرون شپه د اتمې حوزې اړوند سیمه کې دوه تنه وژل شوي او ۳ نور ټپيان دي. پولیسو سیمه کې ۵ کسان چې دوه میله کلاشینکوف هم ورسره وو، نیولي او څېړنې ترې روانې دي. »
د پنجشنبې په ورځ په ۱۶ حوزه کې هم غلو د مسعود په نوم یو کس ووژلو او په تور یې دوه تنه کسان نیول شوي.
د کابل امنیه قومندانۍ د خپاره شویو مالوماتو له مخې،په تېرو څو ورځو له ۴۰ زیات کسان نیول شوي، چې جنايي جرمونه، هدفي وژنې او غلاوې یې کولې.
د مشرانو جرګې غړی هاشم الکوزی وايي: « په دې وژنو کې د کابل ښار کشفي ارګانونه پړه دي. هره پېښه چې کېږي،دوی یې باید دقیقه وڅېړي او عاملین یې ونیسي.»
بل پلو د پوځي چارو یو شمېرر شنوونکي په دې باور دي، د امنیتي سکتورونو مدیریتي برخه کمزورې ده او د غیر مسول وسله والو په نیولو کې جدي اقدامات نه دي شوي او همدا لامل دی،چې جنايي جرمونو پېښې ډېرېږي.
د کابل امنیتي مسوولیت ته،چې د ولسمشر لومړي مرستیال امرالله صالح اوږه ورکړې، خو لا هم ښاریان په ډاډه زړه نه شي کولائ خپل کاروبار وکړي.
