د بغلان امنیه قومندانۍ وايي، پرون شپه د بغلان په مرکزي بغلان ولسوالۍ کې د هلو ترست ماین پاکي موسسې پر دفتر وسله وال برید شوی، چې په پایله کې د یاد دفتر لس کارکوونکي وژل شوي او ۱۴ نور ټپيان شوي دي.
د بغلان امنیه قومندانۍ ویاند جاوید بشارت، شمشاد ته وویل، یاد دفتر شااوخوا ۱۰۰ تنه کارکوونکي لري، چې پرون شپه پرې وسله والو برید کړی.
بشارت دغه برید د طالبانو کار بولي، خو طالب ویاند ذبیح الله مجاهد رسنیو ته په لېږلې خبرپاڼه کې، دغه برید غندلی او د خپلو وسله والو لاس لرل یې په کې رد کړی دی.
د پيښې قربانیان د بغلان مرکزي روغتون ته وړل شوي او د یو شمېر ټپيانو وضعیت نازک ښودل شوی دی.
تر اوسه پورې کومې ډلې د دې برید مسوولیت پر غاړه نه دی اخېستی.
