د روغتيا نړيوال سازمان مشر ټيډروس ادانوم ویلي، د کورونا وبا ضد واکسين توليدونکي هېوادونه بايد خپله پاملرنه کوواکس پروګرام ته واړوي، ځکه د دغه پروګرام له لارې بې وزله هېوادونو ته واکسين وېشل کېږي.
ادانوم اندېښنه ښوولې، چې ډېری بې وزله هېوادونه آن نه شي کولائ، چې خپل روغتيايي کار کوونکي خوندي کړي.
هغه زیاته کړه، بې وزله هېوادونو کې زيات عمر لرونکي نه واکسين کېږي، په داسې حال کې، چې شتمنو هېوادونو ماشومانو ته د واکسين لړۍ پيل کړې ده.
ادانوم دا خبرې داسې مهال کوي، چې نړۍ کې پر کورونا وبا د اخته کسانو شمېر له ۱۷۴ میلیونو لوړ شوی دی.
د جان هاپکنز پوهنتون د شمېرو له مخې، نړۍ کې تر دې دمه د کورونا وبا له امله ۳.۷۳ میلیونه کسانوخپل ژوند له لاسه ورکړی دی.
