سرچینه وايي، طالبانو تېره شپه د دغې ولسوالۍ دوې نورې پوستې سقوط کړي، نن تر غرمې یې د یادې ولسوالۍ بازار هم تر خپلې ولکې لاندې راوستی.
د سرچینې په خبره، دا مهال یوازې د شاه جوی ولسوالۍ وداني، د ملي اردو او پولیسو یو ګډ کنډک د حکومتي ځواکونو په واک کې دي او نورې ټولې سیمې طالبانو نیولي دي.
تېره ورځ هم یاده ولسوالۍ کې طالبانو د حسن کارېز د ملي اردو یو لوی کمپ نیولی و.
طالبانو تېره ورځ همدا ډول تر دوې میاشتنۍ محاصرې وروسته د شینکۍ ولسوالۍ، بازار، امنیه قومانداني، د ولسوالۍ وداني او د ملي امنیت مدیریت هم تر خپل واک لاندې را وستي وو.
د زابل د ولایتي شورا رییس وايي، که دغه ولایت ته پاملرنه ونه شي، د هېواد په سوېل کې به زابل لومړی ولایت وي چې د طالبانو له لورې سقوط شي.
