له نړیوالې ټولنې سره د اسلامي امارت د تعامل څرنګوالي په نوم د بهرنیو چارو وزارت د ستراتیژیکو څېړنو مرکز عملي بحث کړی دی.
د یاد بحث ګډونوالو ټینګار کړی، چې د دوحې فارمټ په درېیمه غونډه کې د ګډون پرېکړه به وروسته کیږې؛ خو د لومړۍ او دویمې غونډې پرتله د غونډې د جوړوونکو او کوربنو په تعامل کې مثبت بدلون لیدل کېږي او په وروستیو ورځو کې ګڼ پلاوي کابل ته راغلل ترڅو په راتلونکې ناسته کې د افغان حکومت د ګډون زمینه برابره کړي.
د بهرنيو چارو وزارت وايي: « د دې لړۍ په دویمه غونډه کې هم د اسلامي امارت د شرایطو د نه پوره کېدو له امله له ژور غور وروسته د مشرتابه لخوا د نه ګډون پرېکړه وشوه او سمبولیک ګډون په کې بېګټې وبلل شو. اسلامي امارت له نړیوالې ټولنې سره تعامل غواړي؛ خو دا تعامل د افغانستان د سیاسي خپلواکۍ، ديني او ملي ارزښتونو او د وطن او نظام د حیثیت په بیه نه غواړي.»
د دوحې درېیمه ناسته چې د راتلونکې جون میاشتې په پای او د جولای په پیل کې د دوو ورځو لپاره ترسره کېږي، ټاکل شوې چې د افغانستان اړوند مسایلو، په کې د ښکېلو خواوو او جوړوونکو له خوا بحثونه وشي.
یاده غونډه کې د ګډون په موخه ملګرو ملتونو سرپرست حکومت ته هم بلنه ورکړې ده؛ خو تراوسه یې د ګډن او نه ګډون په تړاو وروستۍ پرېکړه نه ده کړې.
د ساسي چارو شنونکي یاده غونډه د افغانستان او نړیوالې ټولنې ترمنځ د تعامل زیاتېدو او د شته مسایلود حل لپاره مهمه بولي او ټنیګار کوي، چې په قوي دریځ سره دې په کې ګډون وکړي.
د سیاسي چارو شنونکی اختر محمد راسخ وايي: « په نړیوالو او سیمهییزو غونډو کې د طالبانو ګډون د افغانستان د ولس په خیر دی، ترڅو افغانستان له سیاسي انزوا راووځي او نړۍ ورسره د راکړېورکړې او تعامل لاره خپله کړي، د افغانستان له ولس سره د وخت د غوښتنو مطابق اقتصادي مرستې او بشري همکاري وکړي.»
د سیاسي چارو شنونکی عزیز معارج وايي: « یو خو طالبانو ته بلنه ورکړل شوې ده او مخکې له مخکې ورسره اجنډا شریکه شوې ده او دوی هم تر ډېره قناعت کړی چې ګډون به کوي او له خپل دریځه به دفاع کوي، د کېدونکې پرېکړې به یا پخلی کوي او یا به یې ردوي چې دواړه حقوقي مشروعیت لري، له بلې خوا نړیوال یا د ملګرو ملتونو سازمان د افغانستان لپاره یو استازی ټاکي چې هغه به له ټولو اړوندو هېوادونو او سیاسیونو سره خبرې کوي او بېرته به ځي د دوحې هغه تړون چې شوی دی هغه به پلی کوي او هر لوري چې کوم څه نقض کړي هغه به بېرته سره جوړېږي، دلته افغانستان کې به یو ایتلافي حکومت راځي، په نورو څانګو کې به بدلونونه راځي او نړیوالو سره به تعامل کېږي.»
دوحې د ناستو لړۍ د افغانستان په اړه د ملګرو ملتونو له لوري د فریدون سینیرلي اوغلو د خپلواکې ارزونې پر بنسټ پیل شوې، چې لومړۍ غونډه یې د ۲۰۲۳م کال په مۍ او دویمه یې د ۲۰۲۴م کال په فبروري کې وشوه.
