د افغانستان لپاره د روسیې ځانګړي استازي ضمیر کابلوف ویلي، له تور لېست د اسلامي امارت د چارواکو ایستلو وړاندیز ولسمشر ولادیمیر پوتین ته وړاندې شوی دی.
یوه ورځ وروسته له دې، د روسیې ولسمشر ولادیمیر پوتین په یوه ویډیو پېغام کې وویل، اسلامي امارت دامهال د افغانستان پر ټوله جغرافيه حاکم دی او روسيه د يوې اړتيا په توګه ورسره خپلې اړيکې رغوي او پالي يې.
هغه زیاتوي:« د څه وخت لپاره زه په دې اړه څه نه وایم؛ ځکه په افغانستان کې له طالبانو سره اړیکې تل د پام وړ دي. هو! دا ویلی شم، چې په افغانستان کې ستونزې او ننګونې شته دي او څوک په دې ښه پوهېږي، چې دا له اوسني ځواک او طالبانو سره د اړیکو جوړولو موضوع ده؟ موږ باید دا ومنو، چې طالبان پر ټوله جغرافیه باندې حاکم او د دغه هېواد ټوله جغرافیه اداره کوي او دوی یو واقعي ځواک دی، چې باید اړیکې ورسره پیاوړې شي.»
خو د نوموړي دغه دريځ د سپينې ماڼۍ پر مزاج برابر نه دی او له نړيوالو سره د کړو ژمنو په پوره کولو کې پر پاتې راتلو د سرپرست حکومت له تورنولو سره يې، د ولسمشر پوتين دا څرګندونې نقد کړي.
سپینې ماڼۍ خبرداری ورکړی، چې د پوتين د اوسني دريځ پر بنسټ له افغانستان سره د روسيې چلن ښايي نورو هېوادونو ته ناوړه پايلې ولري.
د سپینې ماڼۍ د ملي امنیت شورا ویاند جان کربي وايي:« موږ په دې برخه کې هېڅ دریځ نه لرو او نه به یې ولرو، چې د طالبانو حکومت پر رسمېت وپېژنو او که نه؟ خو که روسیه دا کار کوي، زه فکر کوم چې دا به نورو ته ناوړه پیام ورکړي.»
د نړیوالو اړیکو کارپوهان د روسیې ولسمشر یاد دریځ ستایي او غوښتنه کوي، چې سرپرست حکومت ته هم په کار ده، څو پر ځینو پرېکړو له بيا غور کولو سره نور هېوادونه هم د روسیې په څېر رسمي تعامل ته قانع کړي.
د روسیې د بهرنیو چارو وزیر سرګي لاوروفوړمه ورځ ویلي ول، چې مسکو غواړي د سرپرست حکومت چارواکي د ترهګرو له نوملړ بهر کړي او سرپرست حکومت له دې اعلان سره د روسيې له پرېکړې هرکلی وکړ.
