چینايي چارواکي وايي، له ۳ تر ۱۷ کلونو عمر لرونکو ماشومانو ته د ساينو واک واکسينو د بېړنۍ کارونې له پاره یې اجازه ورکړه.
دوی وايي، د یاد واکسین کلينیکي ازمايښتونو يې ښه پايله ورکړې ده.
چين دا ګام څو ورځې وروسته له هغې پورته کوي، چې د روغتيا نړيوال سازمان یاد واکسين د بېړنۍ کارونې له پاره تائید کړل.
د روغتيا نړيوال سازمان تر دې مهاله د پي فايزر، موډېرنا او ساینو واک واکسینو په ګډون ۷ واکسینونه د بېړنۍ کارونې له پاره تائید کړي دي.
د جان هاپکنز پوهنتون د شمېرو له مخې، په ټوله نړۍ کې پر کورونا وبا د اخته کسانو شمېر له ۱۷۲ میلیونو لوړ شوی او څه باندې ۳.۷ میلیونه کسان ترې مړه شوي دي.
