د سویلي اسیا په چارو کې د بريټانیا دولت وزیر له بهرنیو چارو وزیر محمد حنیف اتمر سره ټلیفوني خبرو کې ویلي، دوی د افغان سولې په اړه د نړیوالې او سیمه ییزې اجماع له پیاوړتیا ملاتړ کوي.
دغه بریټانیايي چارواکي خبرو کې همداراز ټینګار کړی،چې د سرتېرو له وتلو وروسته هم له افغانستان سره د ناټو او بریټانیا همکارۍ او مرستې دوام کوي.
په ورته وخت کې هغه ویلي، دوی د خبرو له لارې افغانستان کې د روانې جګړې پای غواړي او په دې برخه کې هر اړخېزې همکارۍ ته چمتو دي.
د افغانستان بهرنیو چارو وزیر محمد حنیف اتمر بیا د سولې لپاره د بریټانیا مرسته مهمه ګڼلې او ویلي دي، افغان دولت د خبرو له لارې د جګړې پای ته ژمن دی او په دې برخه کې د نړیوالو زیاته همکاري غواړي.
