د هېواد په بېلابېلو ولایتونو کې تېرو دوه ورځو کې سېلابونو هېوادوالو ته درانه مالي او ځاني زیانونه اړولي دي.
پېښو ته د رسېدو په چارو کې د دولت وزارت مسوولین وایي، په بدخشان، بامیانو، بغلان، سمنګان، تخار، فاریاب او ننګرهار ولایتونو کې سېلابونو تېرو دوو ورځو کې ۲۱ کسان مړه او ۱۹ نور ژوبل کړي دي.
دوی زیاتوي، چې سېلابونو ۹۸۲ کورونه په کلي او جزي ډول ویجاړ کړي، ۵۰۰ څاروي تلف شوي او په بدخشان کې د یوې کورنۍ ۹ غړيو هم خپل ژوند له لاسه ورکړی چې د څلورو يې جسدونه موندل شوي او د پاتې نورو د موندلو هڅې دوام لري.
د دوی په خبره، په سېلاب ځپلو سیمو کې پاکو اوبو ته د خلکو لاسرسی کم شوی او د مرستندویه بنسټونو په ملاتړ هڅه کوي چې سیمو ته پاکې اوبه ورسوي.
پېښو ته د رسېدو په چارو کې د دولت وزارت ویاند ملا جانان سایق وايي:« د روان کال د غبرګولي له څلورمې تر شپږمې نېټې پورې په بدخشان، بغلان، بامیانو، سمنګان، تخار، فاریاب او ننګرهار ولایتونو کې د بارانونو او سېلابونو له امله له بده مرغه ۲۱ تنه هېوادوالو ژوند له لاسه ورکړی او شاوخوا ۱۹ تنه هېوادوال مو ژوبل شوي…. د هېوادوالو شاوخوا۵۰۰ څاروي هم تلف شوي دي، د دې ترڅنګ ۹۸۲ کورونه په کلي او جزي توګه وېجاړ شوي دي. د کومو هېوادوالو چې د پاکو اوبو زېرمې وېجاړې شوي، موږ هڅه کوو چې له موسسو او خیریه بنسټونو سره په همکارۍ هغوی ته د پاکو اوبو زمېنه هم برابره کړو.»
وروستيو سېلابونو چې په بغلان، غور، تخار، فاریاب، بدخشان، سمنګان، سرپل، هرات، لغمان، بادغېس، بامیان، فراه، نورستان، کاپیسا او پروان کې راوتلي وو، له مرګ ژوبلې سربېره یې پاکو اوبو او لوړمړنیو روغتیایي خدماتو ته یې د زیانمنو کسانو لاسرسی ستونزمن کړی.
یونېسف پر خپله اېکس پاڼه لیکلي، په سېلاب ځپلو سیمو کې زیانمن کسان د پاکو اوبو له کمښت سره مخ دي او هره ورځ ۲۲ زره کسانو ته د څښاک پاکې اوبه رسوي.
یونېسف زیاته کړې:« په وروستیو سېلابونو کې د اوبو ډېری سیسټمونه ویجاړ شوي او کورنۍ د څښاک، پخلي او حمام لپاره پاکو اوبو ته د لاسرسي لپاره مبارزه کوي. یونېسف هره ورځ دغو ټولنو ته د اوبو لارۍ لېږدوي او هره ورځ د ۲۲ زره کسانو لپاره، د هر کس لپاره په کافي اندازه ۱۵ لېټره پاکې اوبه برابروي.»
د اقتصادي چارو شنونکي د یونېسف له لوري زیانمنو کورنیو ته پاکې اوبه رسول یو ښه اقدام بولي او له سرپرست حکومت او نورو نړيوالو مرستندویه بنسټونو یې غوښتنې دا دي، چې په سیمه کې اړتیاوو ته په کتو باید په بېلابېلو برخو کې د سېلاب له امله رامنځته شویو ستونزو ته رسېدنه وشي.
د اقتصادي چارو شنونکی لعل ځاځی وايي:« مهمه دا ده چې په هغو سیمو کې چې دغه خلک زیانمن شوي، له هغو خلکو په دغه وېش له دوی مشوره واخلي، هغه خلک هلته ډېر بلد دي، د خلکو ستونزې پېژني، د وېش برخه کې هم باید له مختلفو چینلونو استفاده وشي.»
له دې سربېره پېښو ته د رسېدو په چارو کې د دولت وزارت مسوولین وایي، په سېلاب ځپلو سیمو کې له ۵ زره کورنیو سره یې د خوراکي توکو او نغدو پیسو مرسته کړې او په روغتایي برخه کې د لا ډېرو امکاناتو د برابرولو خبره کوي.
