په چین کې د افغانستان سفیر احمد جاوید قایم ویلي، چین د افغانستان د سولې برخه کې رغنده او اغېزناک رول لوبولی شي.
قایم په یوه خبري کنفرانس کې ویلي، افغان حکومت مذاکراتو ته ادامه ورکوي او ټولې دروازې یې د خبرو او مذاکراتو پر مخ پرانیستې دي.
قایم زیاته کړې، د سیمې د هېوادونو رول او په ځانګړې توګه د چین رول د افغان سولې په راوستو کې خورا مهم دی.
نوموړي ویلي، له چین د لا ډېرو همکاریو تمه لري، تر څو په افغانستان کې دایمي سوله رامنځته شي او روانې جګړې د تل لپاره پای ومومي.
