پاکستاني رسنیو راپور ورکړی، چې پاکستان د افغان سولې خبرو لاسته راوړنو ته هېله من نه دی او د نړیوالو ځواکونو له وتلو وروسته یې په افغانستان کې د امنیتي خلا د را منځ ته کېدو په اړه اندېښنه زیاته شوې ده.
ډان ورځپاڼې راپور ورکړی، پاکستاني چارواکي اندېښمن دي، چې د افغان ډلو تر منځ د پخلاینې له وړاندې تتې هڅې ورځ تر بلې د کمزوي کېدو پر لور روانې دي.
بل پلو د پاکستان بهرنیو چارو وزیر شاه محمود قریشي، د افغانستان د ولسي جرګې مشر میر رحمان رحماني سره د خبرو پر مهال ټینګار کړی، چې د جګړې ښکېل لوري دې له را منځ ته شوي تاریخي فرصته ګټه واخلي.
دا خبرې داسې مهال کېږي، چې ټاکل شوې ده، راتلونکو دوه ورځو کې دوحه کې د افغانانو تر منځ د سولې خبرو دویم پړاو پیل شي.
