له ځنډ وروسته د سرپرست حکومت مشرتابه د روان ۱۴۰۳ مالي کال بودیجه له هر اړخیز غور او دقت وروسته توشېح کړه.
د اسلامي امارت ویاند ذبیح الله مجاهد وايي، د ملي بوديجې په سږنۍ طرحه کې، چې ټوله له کورنیو عوایدو تمويل شوې، د خلکو اړتیاوو او لومړیتوبونو ته په پراخه کچه پام شوی.
مجاهد وايي: « د روان مالي کال په ملي بودیجه کې د خلکو اړتیاوې او لومړیتوبونه په پراخه کچه په پام کې نیول شوي او همدارنګه د سږ کال ملي بودیجه هم لکه د تېر کال له خپلو کورنیو عوایدو څخه چمتو شوې ده. مالیې وزارت به د تل په څېر د ۱۴۰۳ لمریز مالي کال، ملي بودیجه د هېواد په مالي سېستم کې ځای پر ځای کړي او د روان مالي کال اړوند ټولو عادي او انکشافي برخو ته به په پوره روڼتیا سره په نورمال ډول رسېدنه وشي.»
خو د ماليې وزارت او د نورو مسوولو چارواکو د ملي بوديجي پولي ارزښت په تړاو د تېر په څېر هېڅ مالومات نه دي ورکړي.
د اقتصادي چارو یو شمېر کارپوهان وايي، له کورنیو عوایدو د ۱۴۰۳ مالي کال د بودیجې برابرېدل د دې ښکارندويي کوي، چې د عوایدو په راټولولو کې شفافیت او روڼتیا موجوده ده.
دوی ټینګار کوي، چې سرپرست حکومت دې په یاده بودیجه کې ټولو اړینو برخو او لومړیتوبونو ته پام وکړي.
د اقتصادي چارو کارپوه شاکر یعقوبي وايي: « له کورنیو عوایدو په ګټې اخېستنې د بودیجې تشکیل یوه ښه اقتصادي او مدیریتي لاسته راوړنه ګڼل کېدای شي او د دې ښکارندويي کوي چې عواید په سمه توګه راټول شوي او هغه اقتصادي لارې چارې چې د بودیجې د تشکیل لپاره ګټورې وې سمې مدیریت شوې، که په دغه بودیجه کې انکشافي او بنسټيزې پروژې ځای پر ځای شوې وي او افغانستان د پرمختګ او پراختیا لور ته یوسي ډېره ښه ده او که یوازې عملیاتي چارو لپاره وي نو ډېره ګټوره به نه وي.»
سرپرست حکومت ډاډ ورکړی، چې په توشیح شوې بودیجه کې به د روان مالي کال اړوند ټولو برخو ته په پوره روڼتیا سره په عادي ډول رسېدنه وشي.
