د کابل ښار درېیمې حوزې اړوند سر کاریز سیمه کې پرون ماښام دوه پرله پسې چاودنې شوي، چې له امله یې ۱۰ کسان وژل شوي او ۱۲ نور ټپيان دي.
چاودنې د ملکي وګړو پر کاستر موټرو شوي،چې ټول قربانیان یې ملکي وګړي دي.
لومړۍ چاودنه ماښام شااوخوا ۷ بجې د اهل بیت جومات مخې، ته د لین پر یوه کاسټر موټر وشوه.
شااخوا یوه ګړۍ وروسته بل کاسټر موټر،چې د ښاري بس په ډول فعالیت کوي، له ورته چاودنې سره مخ شو.
دغه چاودنې د ځای پرځای شویو چاودیدونکو توکو له امله شوي دي.
د دې بریدونو مسوولیت تر اوسه پورې کومې وسله والې ډلې پر غاړه نه دی اخېستی.
له دې وړاندې هم د کابل ښار په دې سیمه کې چې تر ډېره هزاره توکمه وګړي په کې میشت دي، ورته خونړي بریدونه شوي،چې تر ټولو لوی هغه یې پر سید الشهدا ښوونځي برېد وه.
