یاد وزارت یو وار بیا پر عامو خلکو نیوکه کړې،چې د کورونا وبا خطر پر وړاندې بې غوري کوي.
ښار کې د خلکو ګڼه ګوڼه د پخوا په څېر عادي ده او ډېر کم خلک یوازې ماسک کاروي.
د کابل ښار اوسېدونکی وایي:« خلک د خپلمنځي لرېوالي اصل نه مراعت کوي. په ټوله کې خلک ډېره بې غوري کوي. خلکو ته باید وویل شي،چې کورونا وبا جدي وګڼي او له ګڼې ګوڼې ډک ځایونو ته له ورتګ ډډه وکړي.»
د کابل ښار یو بل اوسېدونکی بیا وايي:« له موږ سره وېره دا ده، که روغتیايي تدابېر پلې نه شي، دا مرګونی وېروس به لا ډېر خپور شي.»
دعامې روغتیا وزارت له هغې پرېکړې درې ورځې تیریږي،چې د کابل په ګډون ۱۶ ولایتونو کې یې تعلیمي او تحصیلي مرکزونه تړلي، خو دغه وزارت وایي، د کورونا وبا د مثبتو پیښو له ډېرېدو سره به نور بندیزونه هم وضع کړي.
د یاد وزارت مرستیال ویاند میرویس علیزی وايي: « که چېرې د کورونا وبا مثبتې پېښې ډېرې شي، عامې روغتیا وزارت به د خپل پلان له مخې،به پرېکړه کوي.»
علیزی زیاتوي، د کابل په ګډون په ختیځ او شمالي ولایتونو کې د کورونا وبا مثبتې پېښې مخ پر ډېرېدو دي،چې تېرو ۲۴ ساعتونو کې ۱۰۴۵ تنه پر کورونا وبا اخته شوي او ۳۳ ترې مړه شوي دي.
د وبا نویو پېښو په ثبت سره هېواد کې پر کورونا وبا د اخته کسانو شمېر ۷۳ زره او ۲۶ کسانو ته لوړ شو.
د وزارت د مالوماتو له مخې، د کورونا وبا له امله تر اوسه پورې ۳ زره او ۷ کسان مړه شوي او څه باندې ۵۷ زره او ۷۰۰ کسان ترې بېرته روغ شوي دي.
د جان هاپکنز پوهنتون د شمېرو له مخې، په ټوله نړۍ کې بیا پر کورونا وبا د اخته کسانو شمېر له ۱۷۰.۷ میلیونو لوړ شوی او ۳.۵۵ میلیونه کسان ترې مړه شوي دي.
