لوی ملي ایتلاف وایي، د نوې ملي جبهې مشر انورالحق احدي اوس هم د ایتلاف برخوال دی او په رسمي ډول یې پریکون نه دی کړی.
د افغانستان ژغورنې ملي ایتلاف څخه د نوې ملي جبهې د مشر انوارالحق احدي له پریکون وروسته داسې ښکاري چې د غني د حکومت سر سخت منتقدین هم خپلو کې یوالی نه لري چې اوس دغه جوړښت د پاشلو له ګواښ سره مخ دی.
احدي په رسمي ډول له ایتلاف څخه د وتلو څه نه دي ویلي،خو ایتلاف له غړو سره یې د راتلونکي نظام او حکومت پرجوړېدو ټکر راغلی چې باور کېږي د ایتلاف غوښتنې معقولې نه وې.
خو لوی ملي ایتلاف اوس هم ټینګار کوی چې احدي له دوی سره دی او ناستو کې برخه اخلي.
احدي تېره ورځ له زیاتو بحثونو وروسته ایتلاف ته خپله پرېکړه ویلې، چې دی نور په دې سیاسي بهیر کې نه دی.
جنجال راتلونکو ولسمشریزو ټاکنو کې د نوماند او مرستیالانو پرسر دی چې تر اوسه یې ایتلاف په ټاکلو نه دی بریالی شوی.
تحلیل کوونکي وایي، ایتلاف د سیاسي ګټو لپآره جوړی شوی چې د مخکښو څېرو په وتلو سره به وپاشل شي.
یو کال وړاندې حکومت کې د ونډې پرسر سیاسي جنجالونه د دې لامل شول چې د ملي یوالي حکومت برخه وال او سیاسي جریانونه ټول د غني په مقابل کې د افغانستان ژغورنې په لوی ایتلاف کې را ټول شول.
په دې ایتلاف کې ډیری داسې څېرې شته چې په تېر کې یو له بل سره سختې جګړې کړي او اختلافونه یې درلودل.
تېرو تجرو ته په کتو هغو ایتلافونو افغانستان ته کومه ګټه نه ده لرلې چې ټینګار د حکومت پر وېش شوی دی.
ملي یوالي حکومت هم د دوه انتخاباتي ټیمونو جوړ دی چې ۴ کاله یې په ځینو مسایلو کې په جنجالونو تېر کړل.
اوس باور نه کېږي دا ایتلاف دې هم پرځای پاتې شي.
د ایتلاف مهمې څېرې اوس د هغو احتمالي نوماندانو په کورونو ګرځي چې ولسمشریزو ټاکنو ته ولاړ دي.
ملي ایتلاف وایي، تر اوسه په کوم نوماند هوکړه نه ده شوې او هڅه کیږي چې یو ټیم راجوړ کړي.
