په شمال ختيځو ولايتونو بغلان، تخار او بدخشان کې د سختو او خونړيو سېلابونو له راوتلو څه کم يوه اوونۍ تېرېږي؛ خو لا هم هلته وضعيت عادي شوی نه دی.
د روغتيا نړيوال سازمان په يوه خپاره کړي راپور کې ويلي، د يادو سېلابونو په لړ کې د شمال ختيځو ولايتونو په ۲۱ ولسواليو کې خلکو ته پراخ مالي او ځاني زيانونه اوښتي دي.
په راپور کې د مړو شویو کسانو شمېر ۲۱۴ او د ژوبل شویو شمېر ۳۲۸ تنه ښودل شوی او د دې ترڅنګ ويل شوي، چې له ۷ زره او ۵۰۰ زيات کورونه هم ویجاړ شوي دي.
د راپور یوه برخه: « د مې تر ۱۹مې پورې ټولټال ۲۱۴ تنه مړه شوي او ۳۲۸ ژوبل شوي دي. نږدې ۸۶۹۶ کورونه ویجاړ یا زیانمن شوي. تر نن ورځې پورې د څه باندې ۲۰۰ ژوبل شویو درملنه شوې. د بغلان بورکې او نهرین ولسوالۍ د پام وړ مرستو ته اړتیا لري. د مرستو رسولو لپاره هوایي ټرانسپورټ ته اړتیا ده. زموږ مرستدویه ټیمونه فعالانه کار کوي، څو په اغېزمنو سیمو کې د څارنې هڅې نورې هم پراخې کړي.»
یاد سازمان همدا راز په زیانمنو شویو سیمو کې د پاکو اوبو نشتون لویه ننګونه بللې او ویلي دي، هڅه کوي زیانمنو کورنيو ته د پاکو اوبو په برابرولو سره د ناروغیو خپرېدو مخنيوی وکړي او د روغتیایي خدمتونو په زياتولو سره د نورو احتمالي ناروغيو اغېز راکم کړي.
د راپور یوه برخه: « په سېلاب ځپلو سیمو کې د روغتيا خونديتوب لپاره ناروغان پاکې اوبه نه لري. زموږ روغتیایي ټيمونه په ساحه کې دي، څو د اړتیا وړ او اړین روغتیايي خدمتونه وړاندې کړي. پر سړکونو، پلونو سربېره روغتيايي مرکزونه هم زيانمن شوي دي. د مې له ۱۱مې تر ۱۵ پورې۲۰۰ پېښې د تنفسي نارغیو، ۲۳۰ د نس ناستي، ۳۵ د شري شکمنې پېښې، ۱۵ شکمنې پېښې د کوویډ۱۹ او ۱۶ پېښې د نمونیا ناروغۍ ثبت شوې دي.»
په ورته مهال د اقتصادي چارو کارپوهان وروستي سېلابونه غمیزه بولي او پر شتمنو هېوادوالو سربېره له نړیوالو مرستندویه سازمانونو غواړي، چې له سېلاب ځپلو کسانو سره بېړنۍ مرستې وکړي، څو دغلته خلک له درملو او سرپناه برخمن شي.
د اقتصادي چارو کارپوه نورالله عزیز وايي: « داسې یو میکانیزم دې رامنځته شي چې له مخې یې داخلي او نړیوالې مرستې په منظمه او منسجمه بڼه راټولې شي او د همدې میکانیزم له لارې دې یوه اضطراري کمېټه جوړه او له دې لارې دې مرستې مستحقو ته ووېشل شی. کمېټه باید له بېلابېلو قشرونو جوړه وي او مرسته کوونکي، مرسته وېشونکي، مدني فعالان او نور عام وګړي باید په کمېټه کې ګډون ولري، ترڅو په منظمه او شفافه توګه مرستې خلکو ته ورسېږي.»
د روغتیا نړیوال سازمان د مالوماتو له مخې، د سېلابونو له کبله زیانمنو سیمو کې۷۰۰ جریبه کرنیزه ځمکه هم تخريب شوې او د شمال ختيځو ولايتونو په ګڼو ولسواليو کې د اوبولګولو کانالونه هم په جزوي او بشپړه توګه ویجاړ شوي دي.
