د بهرنیو چارو سرپرست مولوي امیر خان متقي په سیاسي برخه کې د ملګرو ملتونو د سرمنشي مرستیالې روزميري ډیکارلو سره کتلي دي.
کتنه کې د افغانستان او ملګرو ملتونو ترمنځ پر اړیکو، دوحې ۳مه ناسته او د ناستې پر اجنډا او ترکیب هراړخیزې خبرې وشوې.
د ملګرو ملتونو د سرمنشي مرستیاله روزمیري ډیکارلو وايي: « د دوحې درېیمه ناسته کې به د غړو هېوادونو او نړیوالو سازمانونو د استازو ترڅنګ دا ځل د نړیوال بانک او اسیايي بانک استازي هم ګډون کوي. ملګري ملتونه د افغانستان حکومت سره تعامل غواړي او ښايي واضح بحثونه او د دواړو لوریو د غوښتنو او اندېښنو په اړه خبرې اترې ولرو.»
ډیکارلو دغه راز زیاته کړه چې دوحې درېیمه ناسته کې به د بحث محورونه پر مالي او بانکي موضوعاتو، مخدره موادو پرخلاف مبارزه، کروندګرو ته بدیل معیشیت او همداراز د اقلیم بدلون او ترې افغانستان ته راټوکېدلو زیانونو په اړه خبرې اترې وشي.
د بهرنیو چارو وزارت سرپرست مولوي امیر خان متقي بیا وايي، افغانستان د ملګرو ملتونو سازمان له لومړنیو غړو هېوادونو څخه و، چې له دغه سازمان سره یې فعالې اړیکې درلودې او اوس اسلامي امارت هم یوناما سره په کابل کې ښې اړیکې لري.
متقي زیاتوي: « ګاونډیو او سیمې هېوادونو سره د افغانستان اړیکې مخ پر غوړېدو دي او زیاته یې کړه چې د اسلامي امارت د بهرني سیاست اساسي اصول توازن او اقتصاد محوري ده، چې ټولو لوریو ته په کې ښه فرصتونه شته دی. اسلامي امارت د دوحې په دویمه ناسته کې هم مانا داره ګډون غوښته او یوازې تشریفاتي ګډون ګټور ونه بلل شو.»
متقي راغلي پلاوي سره لېدنه کې هیله ښودلې چې د قطر په نوښت د دوحې درېيمې ناستې د بحث پورتنیو مواردو ترڅنګ ښايي د ترکیب په اړه یې هم هوکړې ته سره ورسېږي.
هغه وايي: « د دوحې ناسته کې دې پر اساسي مسایلو بحث وشي، شته میکانیزمونه دې تقویه شي، اضافي او تحميلي تشکیلات او پرېکړې ونه شي، پر حاشیوي او تشریفاتي مواردو باید له اصلي موضوعاتو څخه پام منحرف نه شي.»
په سیاسي برخه کې د ملګرو ملتونو د سرمنشي مرستیالې ډیکارلو ویلي، د دوحې راتلونکې ناستې اساسي هدف افغانستان سره د نړیوالې ټولنې اړیکې عادي کول دي او زیاته یې کړه، چې د اسلامي امارت اړیکې ګاونډیو او د سیمې هېوادونو سره ښې دي او باید نورو هېوادونو سره هم دو اړخیزو اړیکو کې پرمختګونه وشي.
