پخواني ولسمشر حامد کرزي ویلي، د سولې روان بهیر باید ملي شي او مشري دې د افغانانو لاس ته ولوېږي.
کرزي نن د سولې په تړاو یوه جوړه شوې غونډه کې د خبرو پر مهال وویل، د سولې له بهیر بهرنیانو ځان ته د خپلو ګټو پروژه جوړه کړې، خو افغان لورو ته په کار ده، چې دغه بهیر له پروژه والي را بهر او پر یوه ملي پروسه دې بدل کړي.
هغه وایي، طالبانو او د جمهوریت ملاتړو ته په کار ده، چې له جګړو لاس واخلي، د پردیو د ګټو جګړه پای ته ورسوي او پر ځای دې ټول اړخونه د ملي او اسلامي مسوولیت پر توګه د سولې لپاره کار وکړي.
نوموړي یو ځل بیا ټینګار وکړ، چې بهرنیان افغانستان ته سوله نه راولي او دوی ټول خپلې ګټې لري، نو دا د افغانانو کار او مسوولیت دی، چې په دې حساسو شرایطو کې خپلې ګټې وپالي او خپل هېواد ته سوله راولي.
