عامې روغتیا وزارت هېواد کې روان حالت ګواښوونکی یادوي او پر روغتیايي سپارښتنو ټینګار کوي.
دوه ورځې وړاندې د عامې روغتیا وزارت تعلیمي او تحصیلي مرکزونه هم رخصت کړل،چې پر کور دننه له سختو نیوکو سره مخ شو.
عامې روغتیا وزارت وايي، تعلمیي مرکزونه یې په دې موخه رخصت کړي،چې ګڼه ګوڼه په کې زیاته وه او د کوررونا وبا ډېرې پېښې په کې ثبت شوې وې.
د عامې روغتیا وزارت ویاند مرستیال مېروس علیزی وايي: « تحصلي مرکزونو کې د خپل منځي لرې والي اصل نه مراعت کېږي،که یو محصل پر کورونا وبا اخته شي، نو دا کولائ شي،ډېر نور هم پر وبا اخته کړي. »
عامې روغتیا وزارت هره ورځ د کورونا وبا مثبتو پېښو لوړ ارقام خپروي،چې تېرو ۲۴ ساعتونو کې ۲۵ کسان ترې مړه شوي، خو په ښارونو کې لا هم حالت په عادي بڼه روان دی او د روغتیا وزارت سپارښتنو ته هیڅ پام نه کیږي
د کابل ښار اوسېدونکی وایي: « روغتیايي سپارښتنې خلک نه مراعت کوي. یو شمېر خلک د ساه اخېستلو ستونزه لري. زړه یې تنګېږي او له همدې امله ماسک نه کاروي.»
یاد وزارت وايي، که د کورونا وبا مثبتو پېښو ګراف لوړ شي،نو د هېواد پر کچه به د عمومي ګرځبندیز په تړاو پرېکړه وکړي.
د عامې روغتیا وزارت ویاند مرستیال مېروس علیزی وایي: « پېښو ته په کتو سره به عامې روغتیا وزارت پرېکړه وکړي. که چېرې پېښې په دوام داره ډول لوړې پاتې شي، هغه وخت به نور بندیزونه هم وضعه شي. دغه راز د تعلیمي مرکزونو د تړلو موده به هم وغځول شي.»
د روغتیا وزارت مالوماتو له مخې، پر کورونا وبا د اخته کسانو شمېر ۷۱ زره او ۶۹۰ ته لوړ شوی، ۲ زره ۹۴۴ کسان ترې مړه شوي او ۵۷ زره او ۴۵۰ کسان ترې بېرته روغ شوي دي.
