په افغانستان کې د جاپان سفارت د دې هېواد د نړیوالې همکارې ادارې )جایکا( په همکارۍ په افغانستان کې د یونېسف واکسین پروګرام سره د ۶.۹ میلیونه ډالرو په ارزښت د مرستې هوکړه لاسلیک کړه.
دغه هوکړه په افغانستان کې د جاپان سفیر او د یونېسف استازي ترمنځ لاسلیک شوه، چې له مخې یې دغه سازمان د واکسیناسیون د خدماتو او د واکسین د کمپاینونو لپاره واکسینونه او تزریقي توکي وپیري.
له دې سره به ۸.۸ میلیونه ښځو او ماشومانو ته د پولیو، شري، نري رنځ او ګوزڼ ترڅنګ تور زیړي او تیتانوس په څېر ګواښونکو ناروغیو په برخه کې خدمات ورسول شي.
افغانستان کې د جاپان سفیر کرومییا تاکایوشي وايي: « موږ نن ورځ د ماشومانو د ساري ناروغیو د مخنیوي همکارۍ سند لاسلیک کوو. چې له دې سره به له روغتیايي خدماتو څخه محرومو ولایتونو کې نوي زېږيدلي، له پنځو کلونو کم عمره ماشومان او بالغه نجونې د ساري ناروغیو پر وړاندې د مصونیت خدمات ترلاسه کړي. د ناروغیو بیا خپرېدل د واکسیناسیون اهمیت یادونه کوي. موږ ژمن یوو چې د افغانستان د ښځو او ماشومانو لپاره د واکسیناسیون د منظم پروګرام ملاتړ وکړو او د واکسیناسیون کمپاینونه پراخ کړو.»
له دې سره په افغانستان کې د یونېسف استازی د جاپان سفارت دغه مرستې د واکسین په غوره ترسراوي او د یادو وژونکو ناروغیو په مخنیوي کې اغېزناک ګام بولي.
ډاکټر تاج الدین اویېوالي د جاپان له دې مرستې څخه د مننې ترڅنګ واکسین له ساري او ژوند ګواښوونکو ناروغیو څخه د ساتنې ډاډمنه او ارزانه لار یادوي.
اویېوالې وايي: « د ګوزڼ په څېر ناروغۍ د ماشومانو ژوند تباه کوي. دا ناروغۍ د مخنیوي وړ دي. واکسین له دغو وژونکو او ساري ناروغیو څخه د ماشومانو د ساتنې یوه ډاډمنه او ارزانه لاره ده. موږ د افغانستان د روغتیایي سېستم د پیاوړتیا او له مخنیوي وړ ناروغیو څخه د ډېرو ښځو او ماشومانو د ساتنې په موخه د جاپان حکومت د دوامدارې مرستې هرکلی کوو.»
دا داسې حال کې ده چې افغانستان په نړۍ کې د هغو دوو هېوادونو له ډلې یو دی چې لا هم په کې د پولیو مثبتې پېښې شته دي.
د جاپان حکومت دا مرسته داسې مهال کوي چې په دې وروستیو کې یې د واکسینونو د ساړه ساتلو په برخه کې د ظرفیت لوړونې، د واکسینونو د تدارکاتو او د خوارځواکۍ درملنې په برخو کې مرسته ترسره کړي.
