د سیدکرم ولسوالۍ یو شمېر اوسېدونکي وایي، ولایتي ادارې د پروژو پلې کېدو برخه کې ورسره یوازې ژمنې کوي.
دوی وایي،د سید کرم ولسوالۍ امنیت د ډاډ وړ دی،خو د پوهنې، روغتیا او کرنې برخو کې ورته کار نه دی شوی او له کلونو راهیسې د کوهسین سړک تر څنګ د یو شمېر پروژو چارې نه دي پیل شوي.
د سیدکرم ولسوالۍ اوسېدونکی وايي: « د سیدکرم ولسوالۍ کې پخوا جنګونه ډېر ول. اوس په کې پوستې ډېرې شوي او همدا لامل دی،چې اوس امنیت په کې ښه شوی دی.»
د سیدکرم ولسوالۍ اوسېدونکی وايي: « هغه څه چې موږ ډېره اړتېا ورته لرو، هغه د پوهنې برخه ده. په یو شمېر سېمو کې ښوونځي نه شته. هلته باید ښوونځي جوړ شي.»
د سیدکرم اوسیدونکي همدا راز د روغتیا او کرنې برخو کې هم د پروژو نه پلي کېدو له کبله نیوکه کوي.
د سیدکرم ولسوالۍ اوسیدونکی وايي: « له موږ سره ژمنې شوي، خو تر اوسه پورې عملي شوي نه دي. د کوهسین سړک کیفیت هم ډېر خرابه دی. »
د پکتیا د والي ویاند عبدالرحمن منګل بیا وایي، سید کرم ولسوالۍ کې د ۳۰ بستریز روغتون او یو شمیر ښوونځو د ودانیو جوړیدو چارې روانې دي او د کوهسین پر سړک به هم کار پیل شي.
منګل زیاته کړه: « د توشنک او کوهسین سړک چې د سید کرم او لجې منګل ولسوالیو ولسونو له پاره اساسي پروژه ده. دا پروژه په ملي تدارکاتو کې تر کار لاندې ده او د چارو تربشپړېدو وروسته به یې چارې پیل شي.»
سیدکرم د مرکز ګردیز ختیځ په ۱۰ کیلو مترۍ کې پرته ولسوالۍ ده او اوسیدونکي یې پرر ولسي کچه د بیارغونې پروژو د امنیت ساتنې ډاډ ورکوي.
