د کورنیو چارو وزارت سرپرست سراج الدین حقاني د افغانستان لپاره د اروپایي ټولنې له شارژدافېرې رافیلا یودیس سره کتلي دي.
کتنه کې دواړو خواوو سوله، ثبات او پرمختګ د افغانستان او سیمې پر ګټه بللی دی.
سراجالدین حقاني ويلي، افغانان خلک ډېر ویاړمن دي او د اسلامي نظام تر سیورې لاندې به ښه راتلونکی ولري.
نوموړي همداراز زیاته کړې، د افغانستان د هوساینې لپاره به حکومت تر ممکنه حده هڅې وکړي، څو د پرمختګ په مسیر کې واقع شي.
د کورنیو چارو وزارت ویاند عبدالمتین قانع وايي: « د کورنیو چارو سرپرست وزیر الحاج خلیفه سراج الدین حقاني افغانستان کې د اروپايي ټولنې له سفیرې اغلې رافیلا یودیس سر وکتل، په دې لیدنه کې دواړو لوریو د افغانستان د بېلابېلو سیاسي اوضاع په اړه د نظر تبادله وکړه. یودیس د امن د دوام او افغانانو ته د ښې راتلونکي هیله څرګنده کړه. سراج الدین حقاني افغانانو سره د رافیلا خواخوږي د قدر وړ وبلله او ویې ویل، افغانان قدرمن او ویاړلي خلک دي، د حاکم امن او اسلامي نظام تر سیوري لاندې به ښه راتلونکی ولري. موږ به هم خولې تویې کړو، سختي به وزغمو او ان شاءالله د پرمختګ په مسیر کې به واقع شو.»
د اروپایي ټولنې شارژدافېرې په افغانستان کې د موجوده امنيت دوام ته په پام سره افغانانو ته د ښې راتلونکې هیله څرګنده کړه.
د سیاسي چارو یو شمېر شنونکي بیا د پرمختګ او هوساينې په اړه د سراجالدين حقاني څرګندونو ته په پام سره، زده کړې اړینې بولي او ټینګار کوي، چې تر هغې به هېواد له نړۍ سره سیال نه شي، څو په کور دننه نجونو او هلکانو ته په برابره توګه د زده کړو زمينه نه وي برابره شوې.
د سیاسي چارو شنونکی صفي الله عزیزي وايي: « د افغانستان د پرمختګ یوازینۍ لاره زده کړې دي، موږ زده کړو ته اړتیا لرو او له همدې لارې کولی شو چې له نړۍ سره سیال شو او افغانستان د پرمختګ مسیر ته بوزو. که زده کړې نه وي نو پرمختګ ناشونی دی او د دې یوارینۍ لاره تعلیم کول دي. حکومت باید په دې برخه کې جدي کار وکړي څو د پرمختګ لوړې موخې ته ورسېږو او نړۍ سره سیال شو. زموږ غوښتنه همدا ده چې د نجونو ښوونځي هم پرانېستل شي او د دواړو نجونو او هلکانو ته د زده کړو زمینه برابره شي. د نړۍ زبرځواکونه د همدې زده کړو له برکته د پرمختګ لوړو څوکو ته رسېدلي.»
ځینې نور بیا وايي، د هېواد پرمختګ لپاره دې حکومت بهرینو او داخلي پانګوالو ته د پانګونې زمینه برابره کړي.
دوی ټینګار کوي چې په هېواد کې امینت تامين شوی او له دغه فرصته دې حکومت او ولس دواړه ګټه پورته کړي.
د سیاسي چاور شنونکی کامران امان وايي: « اسلامي امارت دې په افغانستان کې یو څو ټکو ته ډېره پاملرنه وکړي، لومړی دا چې له ګاونډيانو او نړیوالو سره ځان سیال کړي، افغان سوداګر باید هېواد ته راوبلل شي او اقتصاد او سوداګري پیاوړې کړي او ترڅنګ یې په کور دننه او بهر هېوادوالو ته د زده کړو زمینه برابره کړي، هغه وخت موږ کولی شو نړۍ سره سیال شو.»
دا په داسې حال کې ده، چې اروپایي ټولنې شارژدافېرې له دې مخکې هم د سرپرست حکومت له لوړ پوړو چارواکو سره په لیدنه کې ویلي ول، چې اسلامي امارت دې افغان ښځو او نجونو ته د زده کړو او کار اجازه ورکړي څو افغانستان د پرمختګ او ابادۍ لور ته ولاړ شي.
