د غزني امنیې قوماندانۍ له لوري نیول شوي له دوو ټنو ډېر نشهیي توکي د یاد ولایت د ګڼو چارواکو په حضور کې وسوځول شول.
چارواکي وايي، په دغو نشهیي توکو کې ۲۷ کیلو ګرامه هیروین، ۱۲۳ بوتله شراب او پاتې اندازه نور بېلابېل نشهیي توکي شامل دي.
د غزني مرستيال والي رحیم الله محمود وايي: « د میتامفتامین په نامه توکي چې شیشه ورته ویل کېږي او ۳۱۱۴ دانې نشه يي ګولۍ چې د ټابلېټ کا په نوم یادېږي، ۱۲۳ بوتله او اووه پیپه شراب، ۱۷۲ واړه او غټ بوتله او ۱۸ لویې بوشکې د تېزابو په نامه راټول شوې چې دا ټول دلته زموږ او ستاسې ترمخې پراته دي. همداراز د اومانو په نامه۲۰۰ کیلو ګرامه نشهيي توکي هم راټول شوې دي.»
د غزني زون د نظامي محکمې رئیس شیر اغا وايي، د سرپرست حکومت له پالېسۍ سره سم به هېڅ چا ته اجازه ور نه کړي، څو د نشه یې توکو پېراو پلور وکړي.
شیر اغا زیاتوي: « اسلامي امارت هڅه کوي چې فساد، فسق او بې دیني ورکه شي. شپه او ورځ دا مجاهدین لګیا دي هڅه کوي چې د شرابو، نشهيي توکو او تریاکو مخه ونیسي. الحمدالله د اسلامي امارت په یوه فرمان ټول افغانستان کې اوس نه د بنګو بوټی شته، نه تریاک شته او نه نور نشه يي توکي شته. د حفظهالله امیرالمومنین فرمان دی چې د نشه يي توکو کرکېله، پېر، پلور، کارونه او قاچان منع دی.»
د غزني د امربالمعروف رئیس محمد عالم ناصح، نشه یې توکي د غرب دسیسه بولي او وایې، موخه یې ورڅخه د ځواناتو پر نشهيي توکو روږدي کول دي.
هغه وايي: « د منکراتو عمده عامل چې دا نشهيي توکي دي، شراب دي، د دې قاچاقبران دي او یا د دې توکو روږدي دي او دا د فکري جګړې یو عمده ښاخ دی. فکري جګړه چې غربیانو خپره کړې، مهمه برخه یې دغه ده چې د نشه يي توکو له لارې غواړي زموږ د ټولنې معنویات ختم کړي او له زوال سره یې مخ کړي.»
دا په داسي حال کي ده، چي تر دې وړاندي په غزني ولایت کې د سلګونه پر نشهيي توکو د روږدو کسانو درملنه شوې او لا هم دغه لړۍ روانه ده.
