د امریکا دفاع وزارت وايي، د هغو زرګونو افغانانو د احتمالي اېستلو پر پلان کار کوي، چې په تیرو شلو کلونو کې یې افغانستان کې له امریکايي ځواکونو سره کار کړی.
امریکا ته د تګ د ځانګړو ویزو د بهیر چټکوالی د دې پلان یوه برخه ده.
د سي ان ان شبکې د امریکا څلورو حکومتي چارواکو له قوله راپور ورکړی، چې سپینې ماڼۍ تر اوسه په دې هکله پنټاګون ته په رسمي توګه امر نه دی ورکړی، خو حکومت د کانګرس او ځینو نورو ډلو له شدید فشار لاندې دی، چې له افغانستانه د بهرنیو ځواکونو تر وتلو وړاندې باید هغه افغانان چې له دې ځواکونو سره یې کار کړی، و اېستل شي، ترڅود طالبانو له بریدونو خوندي شي.
د امریکا د بهرنیو چارو وزارت وایي، شااوخوا ۱۸ زرو افغانانو امریکا ته د راتګ ځانګړو ویزو ته غوښتنلیکونه سپارلي دي او دې ته انتظار باسي، چې غوښتنلیکونه یې ومنل شي او ویزې ورکړل شي.
دا ځانګړې ویزې هغو پر شرایطو برابرو افغانانو ته ورکول کیږي، چې په افغانستان کې یې په تېرو دوو لسیزو کې یا د امریکایي ځواکونو او یا هم د امریکا حکومت لپاره کار کړی وي.
د امریکا د بهرنیو چارو وزارت یو ویاند بیا ویلي، دا وزارت هڅه کوي، په کابل کې د امریکا په سفارت کې افغانانو ته د ځانګړو ویزو د ورکړې بهیر چټک کړي، خو تر څنګ یې دا هم ویلي چې افغانان کولائ شي، د افغانستان په ګاونډیو هیوادونو کې د امریکا په سفارتونو کې خپلو کارونو لپاره مراجعه وکړي.
