د افغانستان پر بیارغونې د امریکا څار ځانګړې ادارې )سیګار( د یاد هېواد کانګرس ته په خپل درې میاشتني راپور کې ادعا کړې، چې د داعش ډلې د بریدونو دوام اندېښنې پیدا کوي او افغانستان به یو ځل بیا د ترهګرو پر ځاله بدل شي چې د یادو بریدونو په زیاتېدو سره به نړۍ کې ګواښونه زیات شي.
سیګار کانګرس ته په خپل درې میاشتې راپور کې ویلي، داعش په تېرو درېیو میاشتو کې په افغانستان، ایران، پاکستان او ترکیې کې بریدونه ترسره کړي دي.
د راپور یوه برخه: « ویلی شم چې داعش د تاجکستان په شمول د منځنۍ اسیا د هېوادونو وګړي جذب کړي؛ خو له دې سره سره تر اوسه څرګنده نه ده، چې هغه کسان چې د مسکو کنسرټ پر هال یې برید وکړ، په افغانستان کې روزل شوي وو او یا له افغانستانه ورسره ملاتړ کېده او که نه؟»
د سیاسي چارو شنونکی محمد سلیم پیګیر وايي: « داعش په افغانستان کې نشته او ځای هم نه لري؛ خو یو شمېر غربي هېوادونه دي چې د داعش تر شا ولاړ دي او غواړي دا ډله لویه وښيي او له دې لارې خپلو موخو ته ورسېږي.»
په ورته مهال په افغانستان کې د ملګرو ملتونو سیاسي استازولۍ (یوناما) په یوه راپور کې ویلي چې په تېرو درېیو میاشتو کې په افغانستان کې د داعش ډلې د بریدونو په پایله کې ۳۶ ملکیان وژل شوي او ۱۱۸ نور ټپيان شوي دي.
د یوناما د دغه راپور له مخې د مارچ میاشتې په ۱۸مه د پاکستان د هوایي بریدونو او د اسلامي امارت او پاکستاني ځواکونو ترمنځ د نښتو له امله څه باندې ۲۰ ملکي وګړو ته هم تلفات اوښتي دي.
د راپور یوه برخه: « د جنورۍ له شپږمې تر یولسمې د چاودېدونکو توکو له امله ۳۶ ملکي وګړي وژل شوي چې له دې ډلې تر ټولو ویرونکې چاودنه د مارچ میاشتې په ۲۱ مه په کندهار ښار کې وه، چې د یوناما د راپور له مخې د دغې چاودنې له امله ۷۵ تنو مرګ ژوبله اوښتې.»
د نړیوالو اړیکو کارپوه نجیب الرحمن شمال وايي: « داعش او نورې ترهګریزې ډلې د ټول بشریت دوښمنان دي؛ نو د دوی پر وړاندې مبارزه هم د نړیوالې او ټولې نړۍ ګډه دنده ده.»
د اسلامي امارت ویاند ذبیح الله مجاهد د سیګار راپور ردوي او بې بنسټه یې بولي او په غبرګون کې یې وایي، داعش ډله په افغانستان کې ځپل شوې، د افغانستان له خاورې نورو هېوادونو ته ګواښ نه شي رسولی او له هېوادونو غواړي چې په خپله خاوره کې د داعش ډلې ته د فعالیت اجازه ورنه کړي.
مجاهد زیاتوې، کومې پېښې چې په افغانستان کې ترسره شوې دا ټولې پېښې د نورو هېوادونو د اتبعاعو له لوري چې له داعش ډلې سره یې لاس درلوده؛ ترسره کړي.
هغه وايي: « داعش یوه داسې پدیده چې په افغانستان کې یې ټغر ان شاءالله د ټولېدو په حال کې دی، دلته يې پر وړاندې جدي مبارزه شوې ده، دا چې په نورو هېوادونو کې هم دا ډول ترهګریزې ستونزې شته او په افغانستان کې هم چې کومې وروستۍ پېښې کېږي دا د نورو هېوادونو له لوري دلته ترسره شوې وې؛ نو باید مخنیوی یې وشي، پر وړاندې یې مبارزه کې هم ټول باید ونډه واخلي او افغانستان په دې توانېدلی او نوره اندېښنه نه ده په کار؛ خو له بده مرغه چې غرب او په ځانګړې توګه امریکا د داعش له نامه او فعالیته د خپلو ګټو په خاطر ناوړه استفاده کوي او د دې ډلې د لوی ښودلو هڅې کوي.»
په ورته مهال د پوځي چارو کارپوهان وایي، د داعش ډله د غرب له لورې جوړه شوې او د پاکستان په خاوره کې روزل کېږي.
دوی له سرپرست حکومته غواړي چې د پولو امنیت ټینګښت ته جدي پام وکړي.
د پوځي چارو کارپوه اخترمحمد راسخ وايي: « دغه د داعش د پدیدې مفکوره د پاکستان استخباراتو هم په سیمه کې په عملي بڼه جوړه کړه او د افغانستان د جمهوریت چپه کولو لپاره یې ترې ګټه اخېسته؛ خو اوس ویلی شم چې د طالبانو حکومتولي په دې درېیو کلونو کې ورځ تر ورځ د امن او امنیت لور ته روانه ده او غواړي چې نړۍ سره د ښو روابطو لار خپله کړي.»
د امریکا سینټکام یا د مرکزي قوماندانۍ قوماندان جنرال مایکل کورېلا د مارچ میاشتې په لومړیو کې د سنا جرګې د پوځي خدماتو کمېټې ته ویلي وو چې د داعش ډله ښايي په نږدې شپږو میاشتو کې له افغانستان د باندې هدفي بریدونه وکړي.
په داسې حال کې چې د بهرنیو چارو وزارت سرپرست مولوي امیر خان متقي د افغان- قزاق نړیوال نندارتون په پرانیست غونډه کې، د نوم نه ښودلو سره ویلي وو چې د افغانستان درې ګاونډي هېوادونه د داعش ملاتړ کوي.
