د هرات ولایت د ګذرې ولسوالۍ په شهرک سیمه کې د اهل تشيع پر جومات د تېرې شپې وسله وال بريد، چې په پايله کې يې شپږ تنه ووژل شول، په کور دننه او بهر ګڼو غبرګونونه راپورته کړي.
په افغانستان کې د ملګرو ملتونو سیاسي استازولۍ (یوناما) د ياد بريد په غبرګون کې ویلي، عاملین يې باید په نښه او د سزا په ورکولو سره د بريد قربانیانو کورنیو ته انصاف ورکړل شي.
یوناما زیاته کړې:« په هرات کې د اهل تشيع پر یوه جومات د تېرې شپې برید، چې د یوه ماشوم په ګډون په کې لږ تر لږه ۷ تنه ووژل شوي او ټپیان شوي، غندو او د بېړني اقدام په توګه دې د عاملینو پلټنه او ورسره حساب وشي.»
بل خوا د یاد وسلهوال برید په اړه پخواني ولسمشر حامد کرزي هم خواشیني څرګند کړې او دا ډول بریدونه یې تروریستي عمل ګڼلی دی.
هغه زیاته کړې:« زه د دې غمجنې پېښې د قربانیانو کورنیو ته خپله ژوره خواخوږي وړاندې کوم او دا برید په کلکه غندم او دا تروریستي عمل د ټولو دیني او انساني معیارونو خلاف ګڼم.»
بل پلو په افغانستان کې د ایران سفارت هم دغه بريد غندلی او ملکيانو ته په کې د اوښتې مرګ ژوبلې له امله يې د عاملانو د پيدا کولو غوښتنه کړې.
د ایران سفارت په دې اړه خپاره کړي بیان کې د افغانستان له سرپرست حکومت سره د ترهګرۍ پر وړاندې د ګډې همکارۍ او مبارزې ډاډ ورکړی.
سفارت زیاته کړې:« د ایران سفارت د هرات په ګذرې ولسوالۍ کې د امام زمان(ع) په جومات کې وسلهوال برید غندي او د دې پېښې د عاملانو پېژندنې او ورته د سزا ورکولو غوښتنه کوي. د ایران سفارت د افغانستان له سرپرست حکومت سره د ترهګرۍ پًر وړاندې ګډې همکارۍ او مبارزې ته ژمن دی.»
په ورته وخت کې سرپرست حکومت تائيد کړي، چې د امام زمان پر جومات د تېرې شپې په وسلهوال برید کې د يوه ماشوم په ګډون شپږ کسان وژل شوي دي.
تر اوسه پورې کومې وسلوالې ډلې د دغه برید مسوولیت پر غاړه نه دی اخېستی.
