پاکستاني رسنیو خبر ورکړی، چې ښايي دې هېواد کې د مېشتو افغان کډوالو په ګډون درې میلیونه وګړي د شناختي کارتونو نه لرلو له کبله د کرونا وبا ضد واکسین څخه محروم شي.
د رسنیو په خبره، په اوس وخت کې یوازې هغو کسانو ته د کورونا وبا ضد واکسین لګول کېږي، چې پاکستانی شناختي کارتونه ولري او یا په رسمي توګه په دې هېواد کې د کډوالو په توګه راجسټر وي.
په راپورونو کې راغلي، په دې هېواد کې شااوخوا ۵۰ سلنه افغانان ثبت دي، چې واکسین به ورته تطبیق شي.
هلته مېشت افغانان بیا وایې، د کرونا څپه په شدت سره روانه ده او په خبره یې باید دوی ته هم واکسین ورکړل شي.
د پاکستان روغتیايي چارواکي اندېښنه ښيي، که د شناختي کارت د نشتوالي له کبله په دومره زیاته اندازه خلک له واکسین بې برخې پاتې شي، دا کار به د کرونا وبا لا خپرېدو ته زمینه برابره کړي.
د ملګرو ملتونو د کډوالۍ ادارې د مالوماتو له مخې، دا مهال په پاکستان کې ۲.۸ میلیونه افغان کډوال اوسېږي، چې شااخوا ۱.۵ میلیونه یې کارتونه نه لري او کېدای شي له واکسین هم بې برخې پاتې شي.
