د حماس او اسرائيل ترمنځ له يوولس ورځنۍ جګړې وروسته دوه ورځې وړاندې د مصر په منځګړيتوب اوربند رامنځته او مصر يې څارنه کوي.
د اوربند له نافذېدو سره سم دوه مصري پلاوي تل ابيب او فلسطين قلمرو ته د ورتګ خبر ورکړی و او تازه راپورونه وايي، چې له دواړو جنګي لورو سره يې ليدلي دي.
د اوربند له پيل وروسته زرګونه فلسطيني وګړو په داسې حال کې خوښي نمانځله، چې وېجاړو شويو کورونو ته را وګرځېدل.
راپورونه وايي، چې غزې ته په بشري مرستو بار لارۍ روانې شوي، چې خوراکي توکي، درمل او نور د اړتيا وړ توکي پکې بار و.
د حماس او اسرائېل ترمنځ يوولس ورځنۍ جګړه کې نږدې ۲۵۰ کسان وژل شوي، چې ۶۵ يې ماشومان وو.
دغه جګړه وروسته له هغې پیل شوې وه، چې اسرائيلي ځواکونو له بیت المقدس څخه په زور د فلسطيني کورنو پر ايستلو لاس پورې کړ.
