ختیځ کې د ملي امنیت ځانګړي ځواکونه وايي چې تېره شپه یې د ننګرهار مرکز جلال آباد او سره رود ولسوالۍ کې شپني عملیات ترسره کړي دي.
ملي امنیت وايي، د عملیاتو پر مهال یې د داعش ډلې یو تن فعال روزونکی انعام الله د جلال آباد ښار اوومې ناحیې اړوند ماما مېنه کې له سیمې څخه د تېښتې پر مهال وژل شوی دی.
په ورته وخت کې بیا د ننګرهار ولایت سره رود ولسوالۍ په میاګانو کلي کې هم ځانګړو ځواکونو شپني عملیات ترسره کړي چې په ترڅ کې یې د داعش ډلې مهم کس او د هدفي وژنو فعال غړی ظاهر له یوه بل شکمن کس سره نېول شوی دی.
