د ملګرو ملتونو بشري مرستو همغږۍ ادارې (اوچا) وايي، په افغانستان کې د وري مياشتې له ۲۲ څخه تر ۲۸ پورې د سېلابونو د راوتلو له کبله ۱۵۹۰ کورنۍ اغيزمنې شوې دي.
اوچا د يوه راپور په خپرولو سره ويلي، د یادو سېلابونو له امله ۳۵ تنه مړه شوي او ۴۷ نور ژوبل شوي.
راپور کې ویل شوي، ورښتونو کې ۴۷ کورونه ويجاړ شوي، چې د سېلابونو له امله تر ټولو ډېر تلفات چې ۱۲ تنه وو، په اروزګان ولايت کې اوښتي دي.
د راپور یوه برخه:« وروستیو پرلپسې بارانونو او شدیدو سېلابونو له امله ۱۵۹۰ کورنۍ د افغانستان په لسو ولایتونو کې اغېزمنې شوې دي چې ۳۵ کسان یې مړه کړي او ۴۷ نور یې ژوبل کړي. ۴۶ کورنۍ یې بې ځایه کېدو ته اړې کړي چې تر ټولو ډېر اغېزمن ولایت بادغیس دی چې دغلته یې ۴ کسان مړه کړي او همدارنګه دغو سېلابونو په افغانستان کې له ۹۰۰ زیات کورونه په بشپړه توګه ویجاړ کړي، نږدې ۲۰۰ نور له نسبي خطر سره مخ شوي دي چې ۶۳۷۰۰ جریبه کرنیزه ځمکه یې تخریب کړې او شاوخوا ۴۷۰ څاروي یې تلف کړي دي.»
اوچا همداراز وروستیو اورښتونو او سېلابونو ته په کتو ویلي، هڅه کوي تر څو د اغېزمنو شویو کورنیو ته پر وخت مرستې ورسوي.
د راپور یوه برخه:« دا چې د بارانونو نوې څپه پیل شوې اوچا د افغانستان د طبیعي پېښو سره د مبارزې له ادارې سره پر ګډه کار کوي تر څو له اغېزمن شویو کورنیو سره د افغانستان په هغو سیمو کې چې د بارانونو او شدیدو سېلابونو اټکل شوی، پر وخت خپلې مرستې ورسوي.»
اوچا په داسې حال کې نوي ارقام خپروي چې وړمه ورځ پېښو ته د رسېدو په چارو کې د دولت وزارت ویلي ول، چې په ټول هېواد کې ۷۰ کسان مړه او ۵۶ نور ژوبل شوي دي.
د یادونې وړ ده، چې د هوا پيژندنې ادارې راتلونکې دوې ورځې د هېواد په ۲۹ ولایتونو کې د واورې، باران او سېلابونو راوتلو اټکل کړی.
د یادې ادارې د اټکل له مخې، د باران اندازه له ۱۵ تر ۶۰ میلي مترو پورې او د واورې له ۱۵ تر ۳۹ سانتي مترو پورې اټکل شوې ده.
