په داسې حال کې چې ملګرو ملتونو کې داسرائيل او فلسطين ترمنځ د اوربند رامنځته کېدو وړانديز شوی، دواړو خواوو کې د وژل شويو کسانو شمېره ۲۲۹ کسانو ته لوړه شوې ده.
راپورونه وايي، د اسرائيلي ځواکونو هوايي بریدونو کې ۲۱۷ فلسطينيان وژل شوي، چې له ډلې یې۶۳ تنه ماشومان دي.
د دغې لس ورځنۍ جګړې له پيل راهيسې حماس ډلې پر اسرائيل له ۳ زره ۷ سوو څخه زيات راکټي بريدونه کړي، چې دولس تنه اسرائيليان پکې وژل شوي دي.
د اسرائيل او حماس ډلې ترمنځ جګړه کې تر دې مهاله له ۱ زرو ۴ سوه څخه زیات کسان ټپيان شوي هم دي.
ملګري ملتونه وايي، د دواړو لورو ترمنځ جګړې له امله له ۷۲ زرو زيات کسان خپلو کورونو پرېښودو ته اړ شوي دي.
ملګرو ملتونو او د نړۍ ګڼ شمېر هېوادونو هلته د روانې جګړې په اړه اندېښنه ښودلې او د اوربند په رامنځته کولو يې ټينګار کړی دی.
ياده جګړه وروسته له هغې پیل شوه، چې اسرائيلي ځواکونو له بيت المقدس څخه فلسطيني کورنۍ په زور د خپلو کورونو پرېښودو ته اړ کولې.
