د بندخونو چارو د سمون ادارې پوځي مرستیال قاري حبیب الله بدر له شمشاد سره په ځانګړې مرکه کې وایي، د مخکېني حکومت چارواکو په کابل کې د اسلامي امارات بیا واکمنېدو پرمهال په بندخونو کې بندي داعشیانو ته د تېښتې زمينه برابره کړې وه.
د بدر په وينا هغه مهال یوازې د څرخي پله له زندانه شاوخوا ۶۰۰ داعشیان تښتېدلي وو چې اوس یې ډېری بېرته نیولې اوعدليي او قضايي ارګانونو ته يې سپارلي دي.
بدر زیاتوي: « د څرخه پله زندان په درېیم بلاک کې داعیشان وو چې شمېر یې تر پنځه یا شپږ سوه پورې رسېده، دوی ته یې د وتلو زمینه مساعده کړه او دوی ووتل، اوس یې ډېری بېرته نیول شوي دي. موږ د ټولو مجرمینو دوسیې اخېستې دي او عدلیې، قضايي او امنیتي ارګانونو ته مو سپارلي او الحمدالله زیاتره بېرته نیول شوي دي.»
حبیبالله بدر د شخصي زندانونو په اړه هر ډول ادعاوې ردوي او ډاډ ښې چې هېڅ چاته به اجازه ورنه کړي چې شخصي زندان جوړ او خلک محاکمه کړي.
د نوموړي په خبره اوس مهال د هېواد په زندانونو کې ۲۱ زره تنه د بېلابېلو جرمونو په تور بنديان دي چې له دې ډلې يې ۱۴ سوه تنه ښځې دي.
بدر وايي: « موږ د ټول هېواد په زندانونو کې ۲۱ زره بندیان لرو چې ۱۴۰۰ یې ښځینه دي، اووه یا اته سوه مجوزین؛ د اصلاح وړ اطفال دي راسره، همداراز نور بندیان چې جرمي کچه یې جنايي ده، لکه د قتل موضوع، د اختطاف موضوع، اخلاقي فساد او د سرقت مسالې دي.»
د بندخونو د چارو د سمون اداري پوځي مرستیال هغه کنګوسې رد کړې چې ګواکې د افغانستان په بندخونونو کې بندیان له سختو شکنجو سره مخ دي او ربړول کېږي.
هغه زیاتوې، په بندخونو کې بندیان هېڅ ډول نه ربړول کېږي او که څوک یاد عمل ترسره کړي عدلي او قضایي ارګانونو ته به يې ورپېژني.
د بدر په خبره: « الحمدالله په ټول افغانستان کې به یې څوک ثابته نه کړي چې په زندانونو کې شکنجه، تکلیف، وهل او ډبول دي. ما مخکې هم له رسنیو سره شریکه کړې او اوس یې هم وایم که داسې څوک پیدا شي چې په زندانیانو ظلم کوي زه یې عدلي او قضايي ارګانونو ته سپارم، دا هېڅ حقیقت نه لري او زه یې په کلکه ردوم.»
د نوموړي د مالوماتو پراساس دمګړۍ په زندانونو کې شاوخوا ۴۰ بهرني وګړي بندیان دي، چې د بېلابېلو هېوادونو اړوند دي او د مختلفو جنایي جرمونو په تور نیول شوي دي.
هغه وايي: « د ۴۰ تنو په شمېر بهرني بندیان له موږ سره شته، چې د بېلابېلو جرمونو په تور نیول شوي دي او د ګاونډيو هېوادونو، لکه: پاکستان، ایران او داسې نورو هېوادونو کسان دي. سیاسي بندیان نه لرو.»
د بندخونو چارو د سمون اداري پوځي مرستیال دغه راز وايي، د هېواد په ټولو زندانونو کې یې د بندیانو لپاره د دیني ،عصري زده کړو او مسلکي مهارتونو په برخه کې د ځانګړو زده کړو زمينه هم برابره کړې ده.
نوموړی ډاډ څرګندوي چې په ټولو زندانونو کې د بنديانو لپاره اړين امکانات چمتو شوي او له هرو اړينو اسانتياوو برخمن دي.
دا په داسې حال کې ده چې د اسلامي امارت مشرتابه په امر د کوچني اختر په مناسبت د هېواد له بېلابېلو بندخونو شاوخوا ۳۰۰۰ بندیان خوشې شول.
