افغانستان دا مهال له حساس سیاسي او نظامي پړاو سره مخ دی، چې د دې وضعیت څخه د خلاصون لپاره د مقابلو جهتونو تر څنګ، د جمهوریت په چوکاټ کې د ملي اجماع او واحد نظر د رامنځته کېدو لپاره هم هڅې روانې دي.
باوري سرچینې وايي، د ولسمشر غني په همغږۍ د یو شمېر سیاسیونو لخوا د یوې باصلاحیته شورا د تشکیل لپاره هڅې پیل شوي، چې تر اوسه کومې خاصې پایلې ته نه دي رسېدلې.
موثقه سرچینه وايي، هم مهاله د دوو شورا ګانو د جوړښت لپاره کار روان دی چې د دواړو صلاحیت او غړي توپير لري.
سرچینې زیاتوي، د لومړۍ احتمالي جوړېدونکې باصلاحیته شورا پرېکړه به وروستۍ وي، د غړو شمېر به یې له لسو تر پنځلسو کسانو وي او د دوهمې شورا شمېر به بیا زیات، خو مسوولیت به یې یوازې تر مشورې محدود وي.
په ورته وخت کې، د صلاح الدین رباني په مشرۍ د جمعیت اسلامي ګوند ویاند عبدالفتاح احمدزی د دې شورا ګانو جوړول بې اغیزې ګڼي.
رسمي ادرسونه په دې اړه څه نه وايي، خو د دوی له ټولنیزو ادرسونو څخه له سیاسي مطرح څېرو سره د لیدونو او مشورو راپورنه ورکول کیږي چې هدف یې ملي اجماع ښودل کیږي.
شنونکي بیا په دې باور دي چې له دې وړاندې د ملي مصالحې شورا په چوکاټ کې هم د رهبرۍ شورا د جوړښت هڅې شوي او تشکیل یې هم اعلان شوی، خو هغه شورا د صلاحیت له اړخه عاجزه وه او همدا مسله د سیاسیونو او ارګ تر منځ د واټن د رامنځته کېدو لامل شوه.
