مشرانو جرګې استجوابیه ناستې ته دا ځل د مخابراتو او مالوماتي ټکنالوژۍ وزیره ورغوښتې وه چې د لس سلنه کریډټ ګرځولو په برخه کې وضاحت ورکړي.
ولسي جرګې د لس سلنه کریډټ ګرځولو په برخه کې د ولسمشر تقنیني فرمان رد کړی، خو لاهم لس سلنه کریډټ ګرځول کېږي.
مشرانو جرګې غړي وایي، سره له دې چې ګرځول کېدونکي لس سلنه کريډټ غیر قانوني دي، خو له دې سره سره بیا شک هم لري چې ملي بودیجې ته هم نه ځي.
مشرانو جرګې ته په جواب کې د مخابراتو او مالوماتي ټکنالوژۍ وزیرې وویل، په وزارت کې غیر قانوني ګمارنې نه کېږي، لس سلنه ګرځول کېدونکي کریډټ په هرو ۵ ورځو کې د افغانستان بانک ته تاویلېږي، خو د فساد او عدم فساد په تړاو یې څه ونه ویل.
د مشرانو جرګې غړو ته د وزیرې جوابونه قناعت کوونکي نه و او پرېکړه یې وکړه چې له اختر وروسته به د اترا ادارې سره یو ځای د سناتورانو پوښتنو ته جوابونه ووایي.
سناتوران پر مخابراتو وزارت نیوکه کوي چې سایبر سکوریټي نلري، کار اهل کار ته نه سپاري، پر شبکو کنترول نه لري چې په ټوله کې یې زور د ولس له کمزوري اقتصاد ویستل کېږي.
